AC米蘭球員加度素以拼搏見稱，呢位「鬥牛㹴」亦有過人忍耐力，好似月初聯賽對卡坦尼亞，明明開波無耐就拉傷十字韌帶，但堅持踢足全場，結果要入廠大修。不過，上述行為好閒啫，更誇張都仲有……
佢日前接受比利時膝頭權威專家馬騰斯動手術，首先係取出筋腱，再喺股骨同脛骨（即膝頭哥交界處）各鑿一條通道，然後將筋腱穿過去，並喺兩邊固定，形成新嘅十字韌帶。呢種手術馬騰斯成日操刀，客人包括朗拿度、尹巴士頓，不過呢次甚至連老行尊都話嚇咗一跳。
手術刀崩埋嚇壞名醫
原來，加度素脾氣暴躁、人硬頸，就連骨頭都硬過人，搞到把手術刀都崩埋，結果要臨時換過把刀，先鑿得開啲骨。馬醫生講：「佢骨頭硬過人，認真特別！呢種事情從來冇發生過！」前香港隊軍醫郭志堅就話，球員膝頭撞得多，骨頭鈣化程度大於常人，因此骨頭特別硬，出現整崩手術刀情況絕對唔奇。
加度素預計10日就可以用枴杖行路，4個月後可以恢復跑步，6個月後就可以復出。不過，我求大俠就話加度素季尾就可以復出，因為季初佢左手腕多處骨折，原本預計一個月後復出，結果兩個禮拜就出場比賽。所以，「鬥牛㹴」好快就可以復出追咬對手㗎啦！
波里路想昅碧咸「金槍」
除加度素硬過鋼鐵嘅骨頭外，AC米蘭1月仲會多個奇人，佢就係萬人迷碧咸，佢最引人入勝嘅居然係隻「金槍」！AC米蘭禮拜日主場對烏甸尼斯，賽前有個歡迎碧咸儀式。隊友波里路就話好期待快啲見到碧咸，希望將來喺更衣室換衫冲凉嗰陣，裝吓對方嘅重要部位，睇下係咪好似內衣廣告入邊咁堅、咁9999純金，碧咸聽見嘅話，真係唔知好嬲定好笑。