美國減息減到見底咁滯，香港人最關心本地銀行跟唔跟減？噚日幾位賓架包括恒生（011）柯大俠柯清輝同滙豐（005）一姐梁高美懿，出席金城營造45歲生日派對，一班傳媒梗係想捉住佢哋問反應。
柯大俠一早到場，可惜極力保持低調，傳媒想同佢傾又俾公關攔住，埋唔到身，反而恒生個人理財及財富管理業務總經理梁永祥就大方回應，話減唔減息好難講，有人爆咗句：「咁又係，周慧敏同倪震都突然話結婚啦！」梁生聽到有感而發，話家陣係「世事如棋日日新」！唔知講減息定婚事呢？
至於柯大俠，幾位女行家等得耐，見佢現身就忍唔住學啲fans咁，喺會場一齊高叫：「柯生！」路人甲都話估唔到柯生咁多「女粉絲」，可惜企喺成丈遠嘅柯生，一於扮聽唔到。不過，柯大俠見班粉絲咁癡纏，又點會令佢哋失望呢？所以派對完咗，佢都同大家做咗幾句訪問。
