【偽情13日之辣妹失威】城大內地交換生辣妹張茆（Miffty），與花花才子倪震於蘭桂坊上演濕吻5分鐘真人騷後，令她一吻成名，知名度日增，她的個人日誌大膽地顯示其作風豪放，娛樂圈有製作人對張茆甚有興趣，並有意力邀演出，但也有人唱反調，認為她形象差，不會起用。
現年21歲、本是寂寂無聞的城大內地交換生張茆，因為與花花中年倪震在蘭桂坊酒吧一個5分鐘的濕吻，成為全城焦點人物，雖然她一吻成名，在內地的家人也成追訪對象，但張茆卻像人間蒸發一樣，事發後沒現行蹤，她連本月13日的大學考試也缺席，昨日這位濕吻對象卻宣佈迎娶多年女友周慧敏，看來她不只賠上學業，連感情也沒有着落。
蕭定一招手
張茆雖然在這段期間玩失蹤，但其辣妹形象吸引不少網友追看，連蕭定一及周星馳也對她另眼相看，並有意力邀加盟演出，早前蕭定一承認有意向張茆招手，成為旗下藝人，蕭定一表示，由於她為避開香港傳媒追訪不在香港，故目前仍未聯絡得上，另一方面，有指周星馳的星輝電影也對她有興趣。
雖然張茆知名度大增，不過要在娛樂圈打滾，不只是靠知名度，形象也很重要，導演彭順初期曾在一個公開場合表示，考慮在新片《愛出貓》中找張茆演出，並認為她絕對勝任，不過經過連日報道後，昨日記者致電給彭順，他說：「唔會搵佢，𠵱家風頭火勢，形象又唔好，我鍾意啲形象好啲嘅。」
王晶都唔吼
另一導演王晶也說：「冇興趣喎！咁多內地女藝人，唔使要用佢，佢又冇演戲經驗，知名度呢啲嘢可以做出嚟嘅。」
採訪：葉雪
街訪--市民：呢個男人信唔過
坊間對倪震與周慧敏離奇宣佈結婚一事議論紛紛，本報昨日也進行了街訪，有市民覺得整件事十分古怪。
陳太：我冇乜點睇呢單新聞，不過都覺得有啲奇怪。其實件事主要係睇女方自己點睇，每個人都有自己選擇，如果女方覺得值得咪值得囉，咁多年佢都係揀結婚，冇話睇唔睇好。
張小姐：周慧敏好蠢，呢個男人信唔過，我之前喺夏威夷都親眼見到佢同個港姐（指陳法蓉）一齊，當時佢仲係同周慧敏一齊，報道未有講佢哋分手，不過做女人唔好做到咁蠢，倪震真係賤男，可能今次周慧敏逞強唔想輸畀個女人。就算結咗婚，男方都信唔過，我唔睇好佢哋。今次佢形象差到咁，喊可能係想保存自己形象，但我覺得佢係做戲。
Rita：佢兩個可能係受到公眾壓力而分手，𠵱家結婚就恭喜佢哋，知錯能改善莫大焉，兩個人嘅事其他人唔應該有太多評論。
一網講盡--網友：倪震侮辱婚姻意義
倪震昨日戲劇性宣佈與周慧敏結婚，隨即牽動一眾網民狂鬧，網友大部份陰謀論指倪震不懷好意，指他存心欺騙周慧敏。
gianagiana：結咗婚又點喎，倪生咪一樣照會出去玩，𠵱家結婚只不過係想畀番個名份周小姐，唔想畀一眾人話佢係賤男啫…做啲表面工夫…其實咪一樣冇變到
狂人杰克：佢係咪睇到麥當娜個前夫分咗麥當娜成億身家，先有咁嘅決定？
晴天豬豬：倪生有咁嘅做法簡直係侮辱咗婚姻嘅意義~
冰月女公子：oh~個賤佬又玩咩呀？驚冇咗個大水喉嗎？
Keroro.com：真係一山還有一山高…倪生係咪有好多相…片呀之類…迫人嫁畀佢...
今川義元："情趣"定惡搞？我覺得有陰謀
ddc123：世事無奇不有，十足佢老竇小說科幻奇情（現代愛情版），又難得有絕配男女主角，再加一個第三類接觸miffty，全力張揚宣傳…
資料來源：香港討論區、Uwants討論區
