現年37歲嘅梁漢文（梁炳）今日正式加入老襯行列，同拍拖10年嘅女友林文慧（Karen）拉埋天窗。一對新人嘅婚禮簡約新潮，摒棄繁文縟節，噚晚佢哋並冇依照傳統，喺婚前一日唔見面，照舊喺羅便臣道愛巢過夜，到今日下晝1點就去金鐘香格里拉酒店裝身，6點註冊，8點入席，婚禮並冇伴郎伴娘，又不設接新娘儀式，自然冇開門利是。雖然梁炳慳番利是錢，但38圍酒席連禮金、禮服同婚紗等，花費百萬一定唔少得。
尹佬隨時現身
不過梁炳同Karen嘅兄弟姊妹團陣容非常龐大，男女家各有20名成員，戥穿石有蘇永康、陳奕迅、張衞健、許志安同鄭中基等，姊妹團就有徐濠縈、何超儀同何韻詩等，大家都當正婚禮係開P。馮仁昭知道梁炳有請謝霆鋒同張栢芝去飲，佢哋出席機會極高。至於梁炳舅父尹志強（尹佬）可唔可以同女友米雪拍拖到賀，噚日梁炳接受商台訪問時話：「要睇尹佬聽日嘅狀況點，𠵱家佢嘅情況都穩定好多。」
準新郎梁炳難掩興腭心情，佢話：「我今年年頭求婚，跟住搞好多嘢，又要搞酒席，覺得好似過咗好耐咁，終於聽日結婚啦，心情好緊張。𠵱家未知結婚使幾多錢，因為全部嘢都係Karen負責。」
叫志偉咪玩嘢
梁炳話婚禮採用灰、白為主色，上台致辭就即興隨意，佢直認喺籌備過程中同女友意見分歧，但大多時候佢就晒女友，好似Karen瞓唔慣陌生床，所以打消婚前一晚喺酒店過夜嘅念頭，Karen希望有個嚴肅正經嘅婚禮，唔想有玩新娘儀式，梁炳又會同婚禮司儀曾志偉同健仔單聲，唔好令婚禮太搞笑，聽晒老婆話。