花旗納斯達克交易所前主席馬多夫嘅世紀投資騙局越鬧越大，唔單止富豪名人受騙，連跨國銀行同保險公司亦中招，詐騙金額高達500億美金，大拿拿成3900億港銀。原來50年代初出道嘅股神畢菲特，後生時亦曾經俾人誤會係投資神棍，懷疑佢搞「龐氏騙局（Ponzischeme）」（註）。
外形太土冇人信
股神俾人當呃錢黨，𠵱家梗係講都冇人信啦，但畢菲特後生嗰陣真係唔多識打扮，成個𡃁仔咁，所以俾人覺得唔pro都唔出奇。佢本《雪球》自傳講，50年代尾佢出道掛名做基金經理，喺自己地頭奧馬哈搵親朋戚友合夥集資買股票，仲未識「先敬羅衣後敬人」呢種處世之道。
其中一個投資者諗番當年時更話，對股神嘅印象係𡃁仔一名，雖然畢菲特嗰時都年近30歲，但仲俾人以為只得18歲，兼且佢着衫衣不稱身，唔扣領喉鈕，講嘢又快過人，試問咁嘅外貌，又點會唔俾人懷疑？
外表唔專業不特止，畢菲特喺投資決策上更要全權話事，投資者完全冇得過問，佢亦唔肯同人講買咗邊類股票，懶神秘咁。
以為搞緊「龐氏騙局」
只係每到年尾總結時，畢菲特就會向大家分紅，情況十足十家吓馬多夫咁，點會唔惹人誤會以為佢搞緊「龐氏騙局」吖。
註：龐氏為意裔美國人，20世紀初曾誘騙3萬多名投資者，將錢投資在子虛烏有的投資項目上，詐騙逾1500萬美金，故其後同類騙案亦被稱為「龐氏騙局」。
李華華
mailto:[email protected]