揸車遇上座駕頭暈身㷫，懂得替自己解困，就唔會徬徨無助。大師傅坤哥今日就醒你幾招傍身，如最常遇到嘅水箱、電池同輪胎等問題，佢仲循循教誨，叫大家遇事時要冷靜，尤其水滾想加水，起碼要CoolDown20分鐘！
記者：黎頌詩
攝影：陳陶鈞
鳴謝：港機汽車服務中心（25122246）
坤哥有20年修車經驗，經佢斷症兼救番生嘅車，大大話話超過500架，車仔到超跑瓣瓣有，大家學嘢啦！如果喺高速行車嘅公路上汽車出問題無法前進，千祈咪再左度右度玩自救，第一時間係打死火燈兼報警，咁對人對己都安全啲。
水滾 忌高溫開水箱
坤哥認為，如果閣下唔係專業人士，當汽車出問題，可以自救嘅機會唔多，學習急救法，主要係替自己暫時解困，令汽車可以撐至車房維修，當然，喺落車檢查前得先保證車輛停喺安全嘅地方。
第一個最常見嘅問題係水滾。如果水箱水量充足，喺一般行車狀態下，水箱溫度唔會超高，行車途中水滾，就肯定座駕有暗病。若然停車檢查時發現一地水，應該就係水箱漏水，無得救，只有Call拖車。但若水滾只喺塞車時出現，就會係散熱出問題；反之，高速行車水滾，就很大可能係引擎問題。呢啲時候，就可以先加水讓水箱可以撐到去維修。不過要注意，引擎運轉一輪後打開水箱蓋，係極危險嘅事，極高溫嘅水會噴出，殺傷力很大，坤哥話見過連師傅都大意中招。最好嘅方法係熄匙，待20分鐘左右，讓高熱散去，打開前得用手確認一下水箱表面嘅溫度，確定冷卻先打開加水，就最穩陣。
無電 15分鐘翻生
無電，亦係行車途中一個令汽車拋錨嘅頭痛情況。車上嘅防盜系統，加裝嘅音響，都係額外耗電源頭。另外，忘記關燈，無將門關緊，則係人為大意耗電因素。發覺電池無電，有兩件事可以做，首先，可檢查一下是否電池接觸點鬆脫，如果係，你好彩！因為只需用跟車工具再把接觸點上緊即可。若接觸點無問題，咁就好可能係電池出事。無論開邊瓣，首先都係同電池叉電。自備咗手提電池就最穩當，叉佢10至15分鐘又翻生，如果無自備電池，可以試吓搵附近的士司機幫忙搭「過江龍」，公價約$100，我就試過唔收錢㖭。
換胎 落唧要啱位
當行車途中發現汽車不受控地走斜線，就可能係胎氣出問題，對女人嚟講，最要救急嘅肯定係行車途中爆胎，唔夠力係最大弱點，至於男人，坤哥話10分鐘就搞掂！我就即場接受坤哥指點，試試女人換胎嘅可行性。拆輪胎係最大考驗，坤哥徒手搞掂，佢教我可以全個人踩上去，再用車身借力。鬆開螺絲後就可將車唧起，可伸手去車底摸一下，門下方近車輪處有凹陷位，呢個就係落唧嘅正確位置，坤哥提醒，如果唧嘅支持位並唔受力，整部車會有跌落嚟嘅危險！最後，換上新輪胎時要注意嘅，係上螺絲時要以星形次序進行。
出車前3檢
好多問題嘅出現，都係因事前工夫做唔好，坤哥指，開車前稍為檢查一下座駕，事先發現問題，減低出現不必要故障嘅機會，呢點對隔一段日子才使用嘅車尤為重要。開車前，有三方面要檢查：
車胎要夠氣
開車前繞車行一圈，檢視四條車胎是否有漏氣，用肉眼觀察已經足夠。
偈油要過半
最後要抽出偈油的刻度棒檢查，偈油要達到刻度之處的一半以上才算合理。
水箱無亁塘
看看水箱水量是否足夠，若屬不透明類型，則可打開蓋把手指伸入，以碰到有水為合格，當然要喺水箱冷卻底下進行喇。
