一班年輕偶像薛凱琪（Fiona）、房祖名、楊愛瑾、余文樂、孫耀威同蕭凱彤（前歌手蕭瀟）等噚日喺銅鑼灣出席美容大賞頒獎典禮，薛凱琪同房祖名呢對緋聞男女同場雖然唔係新鮮事，但係佢兩個噚日咁啱喺記者會門口撞正，當然立即被現場傳媒要求佢哋影合照，點知Fiona好似借咗聾耳陳隻耳咁，仲立即兜路行，加上公關話佢要上台，所以兩個都逃過合照機會，不過點避都好，Fiona同祖名最終上到台都係要合照，講真兩個人出得嚟都預咗要一齊影相，何必咁兜路，有嘢冇嘢都大大方方嘛。
樂仔否認黐城城
至於近嚟冇乜工作嘅樂仔就成日同郭富城、I.T老闆沈嘉偉同張智霖呢三劍俠一齊，樂仔被指論身家地位都同佢哋差幾班，佢為咗提高身份，近日仲一擲112萬買入黑色C63型號平治新車代步，佢話：「架車訂咗好耐，冇乜特別，自己計清楚負擔得起先買，做朋友唔係睇對方有冇錢，只不過大家都係鍾意車同打桌球先成為朋友，咁我都有由細玩到大嘅朋友，只不過你哋唔識佢哋，所以冇影。」
