畢傑喺擂台經常長居榜首、次席，呢邊〈早飛2+5〉就硬係好難長贏，畢竟周六、日場次多達百場咁多，要從大海中揀出必勝貼士真係唔易。今期就有場好有信心，係日皇盃8強，要「作客王」廣島三箭擊敗柏雷素爾晉級，平手撐硬。
廣島三箭雖然係日乙分子，但今年就以超班姿態捧走聯賽冠軍，就算柏雷素爾係甲組代表，我一啲都未驚過。睇番日皇盃晉級過程，柏雷素爾自第4圈加入角逐後，每圈都好好彩被安排喺主場作賽，可謂未曾受過考驗；再睇佢哋喺第4圈同16強，都只係險勝弱旅草津溫泉同京都不死鳥1:0，基本上贏波本錢唔多。
曾淘汰兩甲組隊
主場出賽都表現成咁，奈何日皇盃8強就會喺中立場岡山市桃太郎球場進行，變相柏雷素爾已再冇靠山。反觀廣島三箭自第3圈開始，每一圈全部都要作客，但佢哋照樣喺法定時間擊敗東京綠茵及川崎前鋒兩支日聯球隊，就知離開主場一樣咁勁。
陣容上，三箭雖有中場森崎和幸及守將森協良太停賽，慶幸已入28個聯賽入球嘅神射手佐藤壽人、以及各入14球嘅兩大中場森崎浩司及高萩洋次郎在陣；至於後防大將盛田剛平及射手祖基治同已傷癒，人腳算齊。反而柏雷素爾有巴西大腦阿歷士、守將酒井宏樹及柳澤隼養傷，預期更不是三箭手腳。
配腳揀番西甲場次，要皇家馬德里主場擊敗華倫西亞開W。皇馬今周有洛賓及馬些路停賽復出，左路威力又勁番啲；至於魯爾日前患感冒冇操到，但係周六就肯定可以上陣。華倫啱啱周三歐協盃爭靚位出線，搏完一輪要回氣。文：畢傑
〈早飛倉〉
主菜：星期六3廣島三箭（平）（1.78）@3,000
渾水摸魚過關：星期六9富咸細（1.59）x星期六48皇家馬德里勝（1.85）星期六53愛斯賓奴勝[+1]（1.7）3x1@300
今日早餐價錢：-$3,300
上日賺蝕：（未計周二成績）
早飛倉結餘：$94,199
規則：$100,000本錢，每日買早餐最多動用$5,000，最少$1,000，逢周二、五起身食早餐（見報）。
周末早飛超級重心
星期六9 富咸細（1.59）
富咸主場出擊守力更具保證，中堅軒治蘭特予人一夫當關感覺；米堡上仗門前屢失良機，把握力一般。
星期日9 燕豪芬勝（1.55）
燕豪芬今季已非勁旅，但尚有拿索域腳風順，要主場擊敗剛戰畢歐協盃的飛燕諾唔難，甚至可贏兩球或以上。
星期日23 希杭大（1.8）
希杭是3支升班馬中攻力最銳利，但防線15戰失35球亦是全西甲最差；艾美利亞已有尼格度復出，取「大」。
難啃早餐
星期六53 馬體會作客難讓
愛斯賓奴自新帥文尼執教後漸見改善，上仗少打一人才反敗華倫；馬體會作客和波率高，讓波有風險。