曾特首快閃去西洋菜街高空視察，似乎想模擬掟通渠水彈落樓，或者想案件重組亦未定，但兩種心態都不獲好評。因為特首去旺角犯險十五分鐘，去工展會掃貨又食又拎唔願走。民心肉做，又難怪旺角居民不滿大細超，假如曾特首醒目，應該延長快閃，落樓後實行走向群眾，拮兩串咖喱魚蛋或者執幾隻出爐影碟回去禮賓府，一邊吃即食粉絲一邊煲碟過聖誕，你話幾香港風味哩。
犯罪學家指擲彈者很可能是反政府反社會的心理不平衡者，外表正常，令人防不勝防。特首高調去案發現場巡視，有意刺激主兇，他再度擲彈的可能性很高。曾特首當自己是餌，引蛇出洞，這15分鐘就不是做騷，比去工展會唔停嘴試食有意義。
高空擲物比遊行示威惡搞，但警方檢控示威者數字遠比拉到擲彈狂徒為高。高空擲磚判監才兩年半，阻嚇性有限，遊行示威卻要在警局被剝光豬。反政府潛力量被迫走向地下，在陰暗的角落擲彈落街，聽到滿街spendaholics遇襲後激動尖叫，擲物狂像見到工展會的鮑魚般吞了兩下口水，下一站目標，如無意外，將是瘋狂搶食的維園。