米老鼠盧維思（MikeRowse）今個禮拜日慶祝60歲大壽，明日（周五）正式榮休，結束34年嘅公務員生涯，卸任投資推廣署署長。回首任內，佢話最矚目事件分別有參與建設廸士尼樂園、亞洲博覽館同沙士期間嘅振興經濟計劃。
多角度講述巨星匯
當中「維港巨星匯」俾人鬧咗幾年，一啲都唔好受，最後仲搞到同政府對簿公堂嚟還佢一個清白。講番佢都有道氣，話退休後會寫兩本書，一本係個人自傳，一本係任內大事，當然包括巨星匯啦，會從多角度講述事件來龍去脈。佢仲有感而發，寄語接任人，如果金融海嘯政府要再搞個振興經濟計劃，最好閃到枱底唔好掂，只係做番投資推廣嘅份內事！
除咗出書，盧維思仲會去大學講書，並會繼續每個周日嘅十公里長跑，為明年2月參加半馬拉松做好準備。