雖云拍拖要互相忍讓，但枕邊人是個儲物狂，珍藏堆到連睡覺的位置都無，都幾難忍。不禁佩服高川，有個史廸仔狂迷女友Gloria，不但沒有阻止她豪花買精品，更用計將女友的興趣轉化為一盤生意，既滿足女友的史廸仔夢，同時避過破產危機，簡直是最佳男朋友典範。
記者︰黃家欣
攝影︰王文忠
場地︰旗艦店（28505040）
狂迷編號：015
姓名︰Gloria（20N歲）、
高川（30歲）
職業：精品舖老闆
年資︰6年
總花費︰六位數字
最難忘︰在日本冒大風雪搶買史廸仔。
夢想︰在紅館開史廸仔Fansclubparty。
獨愛怪樣百厭性格
Gloria與高川是對歡喜寃家，訪問期間經常鬥嘴，更互爆對方糗事，不過最後關頭高川總會讓女朋友Gloria。
Gloria來自儲物世家，爸爸、家姐都有儲物癮，一家人夾份租個大貨倉，擺放爸爸過百部老虎機、姐姐的森林家族及她自己的史廸仔珍藏。小時候，Gloria愛儲Swatch手錶，一見到喜歡的款式就嚷着要爸爸買，結果儲夠戴一年三百六十五日每天不同款式，高川插嘴︰「我覺得儲嘢，要用自己錢買先會珍惜，我細個儲郵票，周圍收集信件，收集完又要浸水，慢慢將個郵票浸出嚟，等個郵票亁番先可以放入郵票簿，得閒攞番出嚟欣賞，咁先算真正鍾意，佢呢啲叫購物狂，有時自己買過乜都唔記得。」Gloria不甘示弱反擊︰「大部份珍藏我都記得㗎！」
廸士尼眾多卡通人物，為何獨愛史廸仔？Gloria興奮搶答︰「我就係鍾意佢個樣百厭醜怪，全身藍色夠另類。」角色性格設定亦似足她兩頭愛犬，「以前屋企養過兩隻狗仔，後來唔得閒照顧兼家人反對，所以送咗畀人，我覺得史廸仔性格與我啲狗仔好相似，有時百厭、有時又擺出個乖樣，好得意。」家人縱容，加上男友千依百順，她對史廸仔的熱情一發不可收拾，「有時我都會叫自己唔好再儲，不過高川又讓步，仲鼓勵我繼續買，因為佢唔想見到我失落個樣。」幸福之情羨煞旁人。
靠史廸仔贏友誼
Gloria最瘋狂的時候，每個月可以豪花五位數字買精品，高川見女友如此揮霍，於是心生一計，他有在網上拍賣的經驗，於是鼓勵女友一是不買，要麼一買便買三隻，一隻儲，其餘兩隻放到網上拍賣以賺取利錢補貼開支。他越搞越成功，除得一班熟客支持，更贏得雅虎拍賣網最傑出宣傳策略金獎，自此二人心更紅，加上熟客推波助瀾，約兩年前二人終於決定開設史廸仔專門店。兩人搞生意，互補不足，Gloria對史廸仔有無限愛心，太投入易失理性，所以多數高川主持大局，但她的Fans觸覺在入貨時便大派用場，她不忘笑高川︰「我覺得靚嘅產品實好賣，有次高川堅持要入一件我覺得唔靚嘅貨，結果賣唔出啦。」高川反投訴︰「有時生意唔好，佢仲話要買公仔，完全唔理盤生意。」
現在好了，Gloria替舖頭入貨，變相解決自己購物慾，遇到極罕產品才會留起給自己，問Gloria有沒有死也不肯賣的史廸仔？她不好意思地答：「有個角色叫阿金，原版造型公仔已經斷市，原價$200，曾經有個客出價$1,000，但我唔捨得買。」高川惋惜︰「做唔到呢單生意，可惜。」高川慣了讓步，雖然口裏說：「做生意唔係咁。」但為博紅顏一笑，無計。
夢想紅館搞派對
現在，她、高川與舖頭已經三位一體，星期一為舖頭例假，但兩人都會偷偷回公司，「喺屋企多數都係上網，放假反而覺得好悶，寧願返舖頭，又可以同客人傾吓史廸仔，開心好多。」Gloria活躍好動，更成立全港最具規模的史廸仔Fansclub，定期有會員聚會，「初初鍾意史廸仔時，覺得好孤獨，身邊無朋友明白，所以就搞Fansclub，由最初二、三十人嘅聚會，到今時今日仍然保持聯絡嘅會員都有四、五千人。」Gloria還會自度史廸仔枚、問答遊戲等，Fans聚會就有講不完的話題，「有客人話我知史廸仔好似屋企隻貓，雖然我無法想像，但大家都鍾意將對寵物嘅愛心，投射喺史廸仔身上。最近有日本朋友話我知，廸士尼專誠畫冲繩版史廸仔卡通片集，只喺日本放映，我已經叫朋友幫我錄，好期待呀。」不少客人會請假來他們的舖頭打躉，交換最新史廸仔情報，當中有百幾二百名會員更是二人知心友，由史廸仔發展出一段段友誼，談史廸仔兼談家事戀愛事。談到夢想，兩人竟合拍地說要為史廸仔在紅館搞粉絲派對，你一言我一語地籌劃，高川打趣地說︰「Gloria係史廸仔狂迷，咁我係做生意狂迷。」總之就是天生一對。
Gloria十大珍藏
