賭王何鴻燊似乎冇大賽贏馬運，去年國際賽，全球最佳騎師靳能特別應邀來港騎「爆冷」爭二千米香港盃，點知畀世界一流高手戴圖理貌似不經意地地打合法茅波，霸咗少少身位，令「爆冷」力追不及，屈居第二。賽後賭王與練馬師對靳能不甚滿意，於是今年飛咗佢，改由澳洲最佳騎師白德民執韁，隻馬又話「歷來最佳」狀態neverbetter，練馬師對《南華早報》講嘅），於是信心十足十，點知出閘後沿途畀蘇銘倫隻「牛精福星」行實，冇法搵到空位衝上，白德民搏晒老命，跑到第四，已算佢騎功蓋世，但事後白德民據聞整親咗尾龍骨，蘇銘倫因阻及其他馬罰停賽，韋達對《南早》講，佢未見過一場更加「粗悍」（roughestrace）嘅賽事。咁嘅環境下，賭王隻必贏馬就輸到馬迷紮紮跳。
本來第五場香港短途錦標由許世勳先生隻「創惑」爆大冷門，在場馬迷立即哄動，話新抱李嘉欣腳頭好喎，「創惑」竟然贏大賽，係人都跌眼鏡，唔通馬主許老爺係飲多杯新抱茶，立即行馬運？大家都想睇李嘉欣拉頭馬，但傳媒老總N話：「唔使望，咁啱得咁蹺，李嘉欣遠遊不在港！」吓，計好數呀？許晉亨陪伴父母左右去拉頭馬噃，資深馬主F就話：「有乜咁出奇啫，平時跑馬都係唔見李嘉欣入場㗎啦。」另一位馬迷又猜測，到咗第八場，賭王一定要威，既然舊親家都捧盃咯，自己隻馬以大熱門姿態贏今日戲肉，更加威啦。唉，世事就係咁奇，以為唔會贏嘅馬就爆大冷，以為贏梗嘅馬就輸到紮紮跳，真係難以解釋。
好彩我哋入馬場只為過癮，從來都係聲大大，雞仔注輸極唔死。在國泰航空午餐招待會中，碰到不少朋友，其中有酒店L在，問佢呢排啲酒店是否不景，佢話：「唔見得吖，仍有八成入住率，demand（需求）係有嘅，只係價錢問題啫，酒店房租一經調整，就有客人嚟，比起沙士時期，好好多。」話雖係如此，減價即係收入少咗，一啲大酒店已經逐漸減少人手，外籍夥計攞房屋津貼嘅已陸續解約，當然唔會請番本地人替補啦，本地夥計唔該繼續加辛，辛苦個辛。