60隻MS護航　νGundam再戰沙煞比

兩年前《高達無雙》為PS3護航，兩大搵錢王夾計初定目標50萬，點知PS3市佔不足，實數只賣得二十幾萬，NB、光榮同SONY無晒面。新作又到，求穩勝加人、加機！再加阿寶同馬沙最終對決嘅《馬沙之反擊》，νGundam同沙煞比忠心Fans超多，再加埋友好度新系統，畀你改寫所有敵人同朋友嘅歷史，幾吸引喎。

文：阿姆羅

駁手接駁自組MS

阿寶同馬沙呢對永遠主角，揸過嘅MS全部變晒經典。廠方深明此道，除咗保留舊作RX-78、紅渣、紅勇同百式外，新作仲加入《馬沙之反擊》嘅νGundam同沙煞比兩大MS。雖然官方話唔支援Online令我勁失望，不過會以下載形式提供新機體，希望遲啲有機會玩埋ZIII同Hiv呢啲名機，想免費下載？以Bandai同光榮要錢唔要面嘅作風，難啲喇。
講開MS，今集收錄範圍都算大，新作品包括《F91》、《V高達》、《Destiny》，登場MS及MA高達60款。較抵死係新加嘅執骨系統，喺戰場上廝殺途中，有機會執到唔同MS嘅手手腳腳，過關後可以嘗試睇下砌唔砌到隻新機出嚟，相信部份隱藏MS會用呢個方法嚟獲得，其實都幾麻煩。