37歲的梁漢文（Edmond）昨日告別單身，迎娶35歲模特兒女友林文慧（Karen），二人拍拖十年終於拉埋天窗。一對新人昨日於金鐘香格里拉酒店筵開36席，Edmond希望太太永遠開心，共同建立開心家庭。
梁漢文與模特兒女友林文慧拍拖十年，二人昨日於金鐘香格里拉酒店舉行婚禮，筵開36席宴請親朋，婚禮由曾志偉及張衞健擔任司儀。於傍晚6時一對新人在酒店舉行註冊儀式，由雙方母親擔任證婚人，Edmond宣讀誓詞時表現得十分緊張，差點連太太的誓詞也搶讀。當完成簽紙儀式後，在場賓客即時起哄叫二人咀嘴，Edmond與Karen徇眾要求咀了兩次，第二次更咀足十秒。
酒量差最怕斷片
Edmond整日都表現緊張，他以一身便服配以西裝褸於下午1時左右乘坐7人車到酒店準備。當見到現場記者即時停步接受訪問，他表示緊張又開心並說：「我好興奮，成個腦好多嘢諗，怕有嘢漏咗未做。」問到Edmond有否與太太提早洞房，他笑言：「如果十年內都冇洞房就呃你啦，唔通掂手指咩。」
由於Edmond以往曾醉酒出洋相，他指為避免有「斷片」情況出現，已一早吩咐兄弟們頂酒，記者揶揄他酒量差，他說：「我知大家好欣賞我，本來諗住唔飲，但好難避免，一生人一次，斷片就唔好啦，我盡量會延遲斷片嘅時間。」Edmond又表示希望太太永遠開心，至於生兒育女一事就未有計劃，他續說：「生BB呢啲順其自然啦，我同佢都好欣賞大家樂天嘅性格，婚後我哋一齊建立開心家庭，我就多咗份責任感，呢一份責任會成為工作動力。」
下午4時半新郎哥由一班兄弟許志安、蘇永康、劉浩龍、陳奕迅、吳國敬以及張衞健等陪同下再次接受訪問，Edmond更緊張得滿頭大汗。Edmond指不會上台獻唱，因為太太不想婚宴似做騷，他說：「我要送一個美麗嘅回憶畀佢。」問到Edmond會否覺得被倪震搶風頭？他說：「吓，係咩，自己冇諗咁多，祝福佢哋似我哋開開心心。」
昨晚到場恭賀Edmond及Karen新婚之喜的藝人包括謝霆鋒、何韻詩、楊千嬅、古巨基、森美及鄭秀文（Sammi）等，不過Sammi逗留了約15分鐘便離去，她表示姨甥女昨日做了心臟手術，故要去醫院探望。
米雪單拖賀新人
此外，米雪昨晚隻身赴會，未有與Edmond的舅父尹志強同行，米雪表示尹佬身體情況OK，不過怕搶一對新人鏡故不到場，她說：「其實佢身體OK可以出嚟，我係怕佢舟車勞頓要早走，同埋佢都有打畀Edmond同佢嘅父母。」
採訪：馬建華、王連連、胡比
攝影：仇志德
小八卦：百萬婚宴中西合璧
《新人禮服》
Edmond：AlexisMabille粉藍色西裝
Karen：
Viktor&Rolf白色吊帶裙
JohnGalliano紫色晚裝
《酒席》
金鐘香格里拉酒店設宴
36圍中式酒席（每圍約$16,000），共花約$580,000（圖）
《佈置》
酒桌以鮮花佈置，舞台以白色及白鮮花佈置為主，花費過百萬
