我求大俠唔知46歲嘅美國拳手荷里菲特有冇中年危機，不過肯定佢當正自己係洛奇。因為佢一把年紀仲夠膽死挑戰WBA（世界拳擊協會）現任重量級世界冠軍華路爾夫，但願佢唔會好似劉德華飾演嘅阿虎咁啦！
窮到燶搵仔女生活費
由荷李活巨星史泰龍飾演嘅洛奇，成60歲過外仲敢上台打拳，荷里菲特後生過佢14年，點解佢唔得呀！之但係，洛奇係電影人物，而荷里菲特係活生生嘅真人，更何況佢嘅俄羅斯對手華路爾夫只係得35歲，而且仲係史上最高（7呎高）同最重（323磅）嘅世界冠軍，你話點打呀？唔怪得華路爾夫寸爆咁話：「當我知道要同荷里菲特打，不禁『嘩』咗一聲。佢個名係響，但對我嚟講佢同一個普通拳手冇分別。」
身高6呎1吋同重210磅嘅荷里菲特，話復出係要證明年過40嘅人都有作為，但我求大俠八到為錢至真，事關佢窮到燶，連仔女嘅生活費都攞唔出，打呢場拳至少袋走差不多760萬港元。點都好，如果佢星期六喺瑞士蘇黎世打贏華路爾夫，就會創造歷史，成為史上最老嘅WBA世界冠軍。
華路爾夫鐵拳難擋
但係，唔係我求大俠潑荷里菲特冷水，打拳除咗講技術，身高體重同埋捱唔捱得都好重要，聽聞華路爾夫一拳閒閒地有成五、六百磅重，荷里菲特年近半百，肯定冇當弗時咁捱得，中幾拳都幾係嘢。
話時話，荷里菲特成46歲人身形仲咁弗，曾經喺一場比賽咬甩佢耳仔嘅泰臣，家陣就身形脹爆，個肚腩大過佢個胸，十足十荷李活笑匠傑克柏克（JackBlack），但咁都好，第日佢冇嘢撈，大可進軍荷李活做諧星，話唔埋會殺出條血路，仲唔使好似荷里菲特咁搵命搏。
開賽時間
21/12/2008 3:00am（香港時間）