【偽情13日之肺腑之言】倪震發聲明宣佈女友周慧敏已答應下嫁給他，哄動全城。在17年前被倪震害得很慘的劉錫明，昨日聞此喜訊感到相當意外，他表示如果兩人是經過深思熟慮而作出這個決定，會衷心祝福兩人百年好合。
倪震17年前因為劉錫明接受電台訪問時，公開表示欣賞周慧敏，導致倪震醋意大發，在自己創辦的雜誌連續三年唱衰對方，又封人家做「毒瘤明」，結果害得劉錫明在香港娛樂圈無立足之地，要避走台灣發展十幾年。日前倪震終於覺悟，在接受周刊訪問時首度表示有歉意，坦承當年明知沒出現過爭女事件，只是自己年少氣盛，才會如此傷害對方。
雖然是遲來的道歉，但劉錫明已表示接受倪震的歉意，而昨日當記者告知他倪震與周慧敏結婚的消息，他不敢相信說：「吓！真唔真呀！有冇咁神奇，真係令人好意外。如果佢兩個人真係經過深思熟慮，我衷心祝福佢兩個百年好合，永結同心，早生貴子。希望佢哋結咗婚之後，倪震要好好錫老婆，唔好再做出傷害伴侶嘅事啦。」
又離又合見怪不怪
問到會否覺得倪震與周慧敏的婚姻很兒戲？劉錫明說：「感情事外人係好難去評論，只有佢哋兩位先至最清楚，在我嘅朋友圈子中，都試過有一對戀人一時話分手，一時又話結婚，所以我都見怪不怪，因為愛情冇得去量度，既然佢哋都決定結婚，咁大家唔好咁多議論，不如衷心祝福佢哋啦。」
在海外漂泊了十幾年的劉錫明，將於下周回港陪家人過冬至，他說：「好耐冇返過香港，所以有幾日假期咪想返嚟見吓媽咪，媽咪年紀越嚟越大，我又成日唔喺佢身邊，真係幾內疚。」
另外，白韻琴自言早已批中倪震及周慧敏是八號風球，很快便除風球，雨過天青，她昨日說：「人生有起承轉合，大團圓結局咁咪好囉，咁先映得感情重要。結婚係人生大事，最緊要親戚滿意，朋友開心，不過我將朋友改為fans開心，白雪公主同白馬王子美麗結局。」有指周慧敏答應下嫁，令人有些意外，白韻琴說：「男女情外人唔了解，周慧敏自己都話除咗佢冇人可以話倪震，罵在郎身，痛在妾身。」
採訪：葉雪
相士話：婚後聚少離多避磨擦
倪震昨日宣佈已與拍拖19年的周慧敏排期註冊結婚，記者就二人的婚姻詢問堪輿學家麥玲玲，她說：「周慧敏出世係戊子日，今年係戊子年，係60年先有一次遇到，所以佢今年嘅情緒好波動，除非今年有喜事發生，唔係就一定會同倪震分手。但𠵱家佢哋宣佈排期註冊結婚，即三個月後嘅事，周慧敏出年都係犯太歲，所以婚事都可以幫到運程，佢哋兩個係互補不足嘅一對，最適合喺一齊，聚少離多嘅話可以長久，如果佢哋有計劃生仔，出年都有好大機會。」
才子劇本：倪震食盡城大三辣？
倪震偷食事件可謂峯迴路轉，經過了13日來的「偷啜」、「引咎分手」及聲淚俱下玩懺悔，到現在連結婚都玩埋，到底「倪才子」下一步會如何？記者就分析出5個劇情發展出來，不知會否有一個合他心水?
1倪震閃電悔婚，短期內與周慧敏取消婚約。
2倪震再被雜誌「偷影」到與張茆啜爆約會。
3倪震發聲明宣佈周慧敏懷孕。
4倪震事先播種，張茆宣佈懷有其骨肉。
5倪震一箭三鵰連媾「城大三辣」張茆、楚墨和小越。
邵國華：大家監察佢
與倪震共事但其後與他反面的邵國華，昨日稱男人經歷過一些事是會頓悟，可能倪震另有想法。有指倪震出招𠱁掂周慧敏結婚，邵國華說：「咁周慧敏鍾意佢吖嘛，倪震應該承擔到。其實好多男人都好似倪震咁，只不過佢係公眾人物咪俾人知，倪震喺自己個聲明度都講過，歡迎大家監察佢。周慧敏應承嫁佢，一定經過深思熟慮，我最多講句恭喜。」
