今年下半年，經濟急劇轉壞，富豪嘅投資損失慘重，中產打工仔遭凍薪減薪或裁員，心情不佳。在此情況下，十二月十四日之國泰航空國際賽居然丁財兩旺，相信馬會高層事前未必諗得到。即使早一日（十二月十三日），沙田舉行國際馬匹拍賣會，最高價一匹──Rodoute'sChoice子嗣，由大馬主鄭強輝（張宇人議員死黨）投得，作價只係五百五十萬元，比去年鄭先生以七百二十萬元買馬，低出兩成四，每隻馬賣出之中位價係三百萬元，比○七年低咗三成三。
咁嘅背景下，國際賽日嘅總投注竟然高達十億零一千萬餘元，平均每場過一億，係今季最好紀錄，亦係○二年以來國際賽日投注最好紀錄，創六年新高，實在出乎意料之外。點解咁好，一時之間搵唔到解釋，假如呢股投注熱情能夠維持落去，今年馬季馬會或者唔需要攞錢畀政府補夠稅款。
既是國泰贊助大賽，國泰自然招待各方來客，左丁山應邀入席，與傳媒界老總坐埋一齊，個個問左丁山攞貼士，第一場容易到極，隨口噏onetwothree三隻，果然就係二號「零用錢」大熱門贏出，三號「新力勁」第二，一號「紙醉金迷」第三，三重彩派二百八十五元，啲傳媒大哥已經話左丁山好醒。第二場繼續畀貼士，三號、六號、十一號，又中三重彩，派二千九百八十八元，嘩不得了，連國泰啲老友記都走埋嚟問貼士，卒之去到第五場，左丁山畀隻「陽光」，輸到自己眼光光，連累不少人，好唔好意思，唯有借水遁，之後雖然中咗第七場「好爸爸」（馬主袁仕傑一早在星期六中午馬會飲茶時聲言谷到盡，抱必勝決心），但弊在全日以為一定贏梗嘅賭王隻馬王──「爆冷」竟然熱爆咗，全程受阻，最後得個梗頸四，全港馬迷輸到暈晒，左丁山早已諗到南非馬一號「飛鷹山」有實力，諗咗一輪，買重「飛鷹山」「爆冷」單Q，兼再加多一隻「希臘寶馬」，買重三重彩。哎吔吔，賭王面黑黑時，左丁山就面青青，所以話世上無絕對必然之事，賭錢千祈唔好瞓身，左丁山呢日在頭三場贏嘅錢就在第五、第八場輸突，得個玩字。約翰摩亞與白德民以為全日威盡，連隻「創惑」都爆出六十八倍大冷咯，仲唔威晒咩。點知輸咗隻賭王愛駒，大摩為之「散咗」（shattered）（《南華早報》如是報道）！