做咗立法會主席多年嘅范徐麗泰，雖然已經卸任，但依然係全國人大常委，要不時開會；跟手做埋馬會首位女董事，不時要入馬場，其實都幾忙，噚日仲獲中遠太平洋（1199）委任做獨立非執行董事，咁咪分分鐘忙過做立法會主席？
據中遠洋份通告講，范太除咗做獨立非執董，仲身兼審核委員會、薪酬委員會及提名委員會成員，任期由明年1月1日起，為期3年。董事會對范太嚟幫手，話「對提升本公司的管治水平大有裨益」。唔通中遠洋班董事見范太做立法會主席時，連「反叛」嘅長毛都管得住，所以搵佢嚟整頓吓公司啲大毛小毛？
09年袍金31萬
至於薪酬，會每年視乎市況而定，09年范太擔任獨立非執董嘅袍金有20萬銀，其他委員會嘅酬金夾埋都有11萬銀，即係一年31萬銀，范太每個月又多兩萬幾蚊落袋。