政府高薪請班副局同政助梗係有原因，就係要佢哋做政治工作，幫手把吓市民脈搏。可惜前高官葉劉就覺得唔少副局長都唔係好識做，以運輸及房屋局副局長邱誠武為例，話當日親自打個電話同的士代表傾吓有幾難吖？個司機大佬都係想搵個高官傾吓點搞啫，唔明點解邱副局長諗唔通？據知邱副局長出事之後，上立法會panel前都有親自打畀葉太「求教」，可惜都係太遲，難逃俾議員圍剿厄運。
搵財爺政助落區
葉劉又教精一眾副局長，時不時都要應酬吓街坊，佢大讚財爺鬍鬚曾識用政治助理，事關有次佢邀請鬍鬚曾研究公屋富戶係咪應該免租時，鬍鬚曾嗱嗱臨叫政助葉根銓跟進葉太落區聽民意，最終葉根銓喺屋邨度留咗個幾鐘，聽勻居民訴苦先至走。傾完一大輪雖然冇乜結論，但至少班街坊好滿意咁收貨，唔會再起勢鬧政府，咁先為之止到咳。
其實周不時都有啲街坊衝上葉劉寫字樓求見，佢話會來者不拒，三唔識七都會聽吓有乜苦況，事關佢係民選議員，同市民溝通唔慳得。呢一點邱副局長就要好好學習，唔可以再話唔識人哋係乜水就一個電話都唔肯打。