石硤尾廠廈出現喺跑馬地？由馬會捐成億元、將石硤尾空置廠廈改建而成嘅賽馬會創意藝術中心，噚日喺跑馬地賽馬博物館搞為期半年嘅展覽。 展覽請嚟長駐嘅藝術團體，利用留喺工廠嘅廢料，包括膠衣架、鐘錶配件、蒸籠等，重新創作成藝術品，表達呢個見證香港工業興衰嘅廠廈，點樣蛻變成創藝中心。