「養兒一百歲，長憂九十九」，相信是每個父母心中的寫照。張國強（KK）有一子兩女，最大20歲，最小12歲，理應累積很多教兒經驗。但KK話其實做父親同做人一樣，都要終身學習。「無人夠膽講自己天生係一個爸爸，我希望學到將責任放喺自己身上，保護家庭，同埋學識『忘我』，咁先叫成功。」
記者：林佩婷
攝影：林栢鈞
場地提供：Amaroni'sLittleItaly（22658818）
童年似軍訓
別以為KK給人的印象永遠是笑容可掬，就很易話為，剛作為一個父親時，他是嚴父一名。「西方人成日話仔女到18歲就要自立門戶，但我覺得做父親係終身責任制，尤其細個時，對子女管得較嚴。好似小朋友細個揸筷子姿勢有問題，就堅持要佢哋揸到好為止。自己細個做唔到嘅事，又好希望仔女可以做到，所以當時做咩都好似軍訓咁。」問細女Holly點睇？「爹哋只係想自己好。」果然有家教。
只是KK一直不知子女的想法，直至他們漸長，遇到爸爸教訓時，才夠膽講出心裏話。「好似以前入房見佢哋一邊聽歌一邊做功課，就會話佢哋唔專心；大仔Timothy細個學踢足球，我用自己踢波觀念教佢，要求高又嚴格，反而令仔仔唔想踢……直到佢哋識得開始表達意見，話番我知佢哋習慣係咁，又或唔想咁做，應該俾佢哋自己嘗試，嗰刻我先發現原來自己無深入了解過佢哋。所以，𠵱家仔女都大，我學識有問題就要開聲講，若仔女開聲講想法時，我自然就會停口由佢試。」
學習「忘我」
20年的父親生涯，令KK明白到只重視自己的主意是行不通的，故開始學習「忘我」。「細路都係人，需要尊重。若果只記得自己呢個『我』，好容易會忘記自己嘅mistake，所以我哋唔應該成日哦啲仔女，覺得佢唔掂，可能個仔喺出面好掂呢！仔女有事發生時，亦唔好咁快出手，未必幫到手之餘，又會令佢哋有依賴。所以我學識倒不如喺旁邊睇住，好過幫佢搵答案，以免好心做壞事。」
兒女自有兒女福
面對兒女，父母基本都「忘我」。故比忘我更高難度的，是「捨得」。「Timothy屬聆聽型，善解人意，我同佢傾到偈。佢性格好低調，但有時做嘢又出人意表。好似高中畢業禮，上台領獎先知佢拎到獎學金，嗰刻真係好surprise。但有時又驚佢太低調，唔夠主動。可能細個成日叫阿哥要讓吓個妹，造成Katy比較剛強進取，不達目的不罷休，所以會擔心外人能否咁遷就佢？妹妹Holly係兩人混合體，但有時實在太過樂於助人而忽略咗自己……（下刪三千字）」正想說點安撫話，好在，KK自顧自也懂說：「有時擔心亦作用不大，因為兒女自有兒女福。」
飲得杯落？
畢竟大仔Timothy今年20歲了，家姐Katy17歲，細女Holly也12歲。仔女開始大，仍舊會擔心他們將來、已忘了我的KK，今天，終身學習的責任課題，或者是捨得放手。
