白花油（239）上年有錢賺有息派，順風順水，可惜今年流年不利，「白花油王子」顏福偉惹官非要做社會服務令，搞到行政總裁個位都要讓座，只做執行董事。噚日白花油仲發埋盈警，話預計今年業績會見紅！真係禍不單行。不過公司噚日依然宣佈派第三次中期息每股1.5仙，算係對股東一啲安慰。
派息1.5仙安慰股東
份通告話，業績見紅係因為全球金融及物業市況逆轉，令「集團投資物業，以及證券組合公平價值有所變更而錄得虧損，及滙率波動所致。」
最尾呢句，好易令人產生聯想，所以通告特別補充一句：「避免誤解，本集團並無及將不會涉及任何累積或累沽工具。」即係先旨聲明，我哋冇玩Accumulator（累計認購期權）或者Decumulator（累計認沽期權）。
唔玩都損手，喺金融海嘯下都好難避免囉。白花油賺變蝕，自然急住要現金，佢哋10月時本嚟想賣咗銅鑼灣哥頓大廈天台物業，雖則賣天台套現嘅金額，對集團嚟講好濕碎，但喺呢個時勢，慳得一蚊得一蚊啦。可惜，最終賣唔成。
年宵攤檔慳住投標
於是，就連嚟緊嘅年宵攤檔都要慳，上年佢哋用近5萬銀投咗維園年宵個亁貨舖王，今年就只係用1萬銀左右，投個靜靜哋嘅攤位。
咁又係，白花油王子單非禮的士司機案仲未完，阿王子提出咗上訴，家陣仲等緊結果，佢被判嘅180小時社會服務令，據講仲有十幾粒鐘未做完，所以低調啲都啱嘅。
李華華
mailto:[email protected]