經濟麻麻，人人都話勒緊褲頭，但成立咗53年嘅嘉華國際（173）噚日依然落本搞周年晚宴，喺對正維港嘅會展筵開90席，到場賓客粒粒皆星，好似有滙豐鄭海泉、信興蒙民偉同埋行會嘅梁振英等等，又搵埋陳潔靈大唱懷舊歌，大會安排都算周到。由於場面太盛大，搞到主人家呂志和（左二）父子都要排隊等入席。
不過講到點樣振興香港樓市，嘉華掌舵人呂志和就耍手唔做「大好友」，話趁金融海嘯稍為歇歇唔勾地。佢仲乘機插政府，話勾地個底價𠵱家都仲係揸得好緊，地產商想買平地都唔得。
呂志和跟手又派定心丸話，地皮底價既然咁貴，適合起豪宅嘅土地供應始終有限，樓價最近回落只係信心問題，皆因早排有同行平價推盤，啲人湧到去買、打交咁買。佢仲話，中價盤跌價已經差唔多，豪宅只會略有調整啫，大家有錢不妨慢慢吼住入貨喎。
李潤芳攝