近期天氣乍暖還寒，小弟同戰友畢傑都相繼「中招」患上流感，可能因為帶病貼波，近期〈早飛倉〉水準唔係咁好。不過唔使怕，我哋兩兄弟已經好番晒，希望今期開始，〈早飛倉〉手風轉番順。
提起天氣轉凉，不經不覺又到年尾，聖誕同元旦兩大節日就到，但歐洲不同聯賽有唔同賽程安排，直接影響今周歐協盃嘅選擇；今期重心貼桑坦德主場可以擊敗曼城。目前A組形勢，曼城3戰已經有7分，篤定出線，今仗只在乎有冇心爭首名；相反，桑坦德3戰只得2分排第4，如果今場唔贏波，就肯定過唔到第3嘅史浩克04而出局。
曼城留力戰快車期
曼城呢支英超億萬大軍，聯賽連續3場不勝，跌吓跌吓已經去到17位，莫講話爭歐洲賽資格，𠵱家隨時要打護級戰。英超冇歇冬不特止，更在聖誕新年開快車。曼城完成今場歐協最後一場分組賽後，8日內要打3場波，其中更有兩場作客，曉士今仗又點會唔留力應付英超快車。
曼城上仗對聖日耳門，已經收起羅賓奴及米卡李察士等主力，相信今仗會起用更多後備兵。相反西甲進行完下輪賽程後就歇冬，明年1月4日才重開，即係桑坦德主場連鬥曼城同馬拉加，眾將就可以開心過聖誕；以上仗桑坦德可以作客迫和聖日耳門，對歐協盃唔係放棄，今次力捧佢贏波。
過關方面，先博AC米蘭對禾夫斯堡開「大」，呢場周三歐協盃賽事，兩隊已篤定出線，只係爭首名，以AC同禾堡後防都多失波，博「大」合理。另外，周四C組賽事，史特加上仗對拜仁已喜見復勇，球隊亦要博3分爭出線，主場對已篤定出線的標準列治，我信主W。
牽牛
周中早飛超級重心
星期三7
阿積士勝[-1]（2.15）
阿積士力爭首名，面對同組最弱兼篤定出局嘅布拉格斯拉維亞，主隊眾將可望大數。
星期三10
拉科魯尼亞勝（1.7）
拉科魯尼亞主場對南錫，勝方肯定出線；以拉科主場可以擊敗飛燕諾，面對作客不濟的南錫贏得。
星期三13
波圖勝（1.42）
周三葡超獨腳戲，波圖近況回勇，已6連勝，面對已4場不勝的艾馬多拉，客勝穩陣。
難啃早餐
星期三4
樸茅W勿沾手
樸茅已出局，近期後防亦多失波，面對同樣出局的海倫芬，雙方欠戰意下，主W不宜捧場。
〈早飛倉〉
主菜：星期四5桑坦德勝（1.8）@1,000
渾水摸魚過關：星期三5AC米蘭大（1.8）x星期四5桑坦德勝（1.8）x星期四9史特加勝（1.55）3x1@500
今日早餐價錢：-$1,500
上日賺蝕：-$1,300
早飛倉結餘：$97,499
規則：$100,000本錢，每日買早餐最多動用$5,000，最少$1,000，逢周二、五起身食早餐（見報）。