「鬧爆你！鬧爆你！睇唔過眼就要鬧爆。」一向是潮人林祥焜的作風，心中那團火，由言行到衣着都表露無遺，同是有火之人，長毛獨愛哲古華拉Tee，他卻是野性Punk褸癡，風雨不改，Punk足一世。
記者：趙志雄
攝影：陳盛臣
狂迷編號：012
姓名：林祥焜（30N歲）
年資：十幾年
總花費：五位數字
職業：高潮樂隊主音，漫畫家。
最難忘：戴住把Punk鎖，被差佬當賊辦。
最珍藏：所有皮褸，有些還是DIY。
戴R鎖十幾年
中學時代已經玩搖滾的林祥焜（長棍），出來工作後結識一班愛Punk之人，一身Punk打扮就由那時開始。他喜歡英國樂隊SexPistols，對Punk越來越有興趣，衣着打扮都受他們影響，「我頸上呢把鎖，同SexPistols第二代低音結他手戴嗰把一樣，一戴就戴咗十幾年。」其實那把鎖跟一般的鎖沒分別，只是玩Punk的人叫它作「R鎖」，具有象徵意義且非常罕有，炒價千多元起，萬一遺失鎖匙，豈不是要找開鎖佬？
提起那把鎖，長棍冒火三丈，又忍不住要鬧爆：「有次我喺街俾差佬截住，佢問都無問就扯住把鎖問：『喂！做乜鎖住自己呀？』班差佬真係好愚蠢無知，𠵱家連LV都出鎖做飾物啦。我好憎差佬，我又唔係賊，點解要咁無禮貌對我？」
因為一身Punk打扮，他上街經常被查身份證和搜袋，甚至被人當賊辦，在眾多收藏飾物中，他有一個手銬，本來很想戴，卻怕出街被警察截查，「我有朋友戴咗條子彈皮帶出街，俾差佬捉番差館，告佢藏械，所以呢個孖葉，我唔敢戴。」
由頭Punk到尾
標奇立異被人打
被警察查身份證是小事，長棍說：「我有個『公雞頭』朋友有次行街突然俾人打，有個的士司機無端端落車衝埋佢身，對住佢講：『你知唔知你好樣衰。』講完就一個士巴拿『車』落頭，朋友當場爆缸，真係好寃枉。」無錯樣衰沒罪，但為甚麼要標奇立異呢？「玩Oldschoolpunk就係要反建制、要破壞，所以髮型要反地心吸力，要標奇立異，衣着上嘅尖釘表達攻擊性，宣洩對社會不滿，就係要人哋驚我哋。」
他即場展示自己的SM皮帶、方釘手帶和皮帶上的大扣針，配合一身黑褸黑褲，反叛狂野有餘，但攻擊性就一般過一般。我跟他由西灣河出發至銅鑼灣，沿途街坊和學生都打量他的Punk打扮，抵達銅鑼灣，繁忙下班一族無特別注意他，他反而惹來警察注視，若非攝影師在旁，他又可能被查身份證。
尖釘自插刮傷面
Punkfashion帶DIY精神，每件皮褸都是獨一無二，訪問當天，長棍穿了件領子鑲滿圓釘的皮褸，他說：「皮褸係Punkfashion一部份，呢件原本係電單車手專用皮樓，啲圓釘係我逐粒逐粒親手窩上去嘅，窩釘嗰晚好甘，窩到隻手爆晒缸，我特登託朋友喺日本買呢啲圓釘。」他打算把整件皮褸鑲滿圓釘，那時豈不是變成一件鎧甲？我拿起皮褸，竟如書包般重，穿起來不累嗎？「我朋友有件皮褸重過鐵皮，玩得Punk，習慣晒着重到死嘅皮褸。」除圓釘外他更愛襟章，因為每個襟章都代表一隊樂隊，滿身釘會不會插傷自己？他試過被尖釘刮傷臉孔，「有次同人夾Band，大家手舞足蹈，唔覺意Fing手，插到自己塊面流血。」
長棍自認是香港擁有最多皮褸的Punk友，家中擁有7件皮褸，全是窄身的，相當耐穿，有些已經不合身形了，因為是多年前買下的，他挺胸收腹好不容易才拉上拉鏈，十足戴腰封一樣。無論逛街夾Band，他日日穿窄褸窄褲，天熱穿皮褸焗出一身汗，天冷穿皮褸又不保暖，確實有點自找苦吃，他說：「慣晒咯，鍾意就無計。」穿皮靴會否腳臭，他笑說：「Keep住換襪就唔臭，呢對靴我着咗十幾年，一啲臭味都無。」
老了繼續Punk
女人愛姿整，Punk友也一樣，由髮型、眼鏡、衫褲鞋襪到飾物，長棍都很講究，他手戴四隻戒指、掛頸R鎖、皮帶上別上大串金屬鐵環和大扣針，出街肯定要花很多時間準備，「襯衫一啲都唔煩，都不知幾好玩！反而冲凉煩到嘔，我真係好憎冲凉，但唔冲凉又好臭。」願意花時間襯衫卻討厭花時間洗澡，真奇怪！除每天梳一個超級撒亞人式Punk頭，他還經常染髮，保持半黑半金髮型，是煩惱是享受？愛化妝的女士可能感同身受。Punk不是年輕人專利，無分年齡，「好多五、六十歲嘅㗎佬都日日着皮褸，一着起就好反叛好Teenager，完全無問題。」他發誓，縱是老了，也會堅持這身打扮。
珍藏
