在陸羽飲茶，後面有人搭膊頭，連忙舉頭一望，竟是有幾百日冇見嘅加燦Ｔ。老Ｔ移民加拿大多年，十年前回流，撈撈吓就北上，居然在神州北方落地生根，娶埋靚女做老婆，佢話上到去見到不少民企老闆、大款大把錢，自嘆遠遠不如，自認係加燦，意思與港燦相同，故稱加燦Ｔ。佢又在內地住得好舒服喎，既然曾長住多倫多，又唔怕大陸東北冰天雪地啫，佢久唔久就返香港一行，因奉會計師之命，在內地不能連續逗留超過一百八十天，但弊在返到嚟香港，見番晒啲老友，佢又喜歡香港到唔願意返回北方，要靚老婆下通緝令，先至肯回家去。
在北方究竟搞邊科？加燦Ｔ話做傢俬廠顧問，憑佢一口英語與國際經驗，為傢俬廠打開北美及歐洲市場，生意做得唔錯，頗受老闆器重。最新project係乜呢？就係為二○一二年溫哥華冬季奧運頭痛，溫哥華冬奧有唔少比賽在滑雪勝地Whistler舉行，此地位於溫哥華以北，車程兩小時或以上，每年冬季就擠滿遊客，外匯Ｍ曾講過，早一年卜位都卜唔到Whistler嘅酒店。冬奧需要唔少室內傢俬，正在環球招標，加燦Ｔ認為佢間工廠有勝出希望，但係加拿大人買傢俬，想出絕招，就係冬奧過後，供應商要回收所有傢俬，換言之，投標商本來想話一批傢俬賣（假設例子價格）一百萬加元嘅，但因為要回收，須要計埋傢俬變成二手貨後嘅剩餘價值，減除之後，投標價可能係七十萬加元。加燦Ｔ話：「計成本加利潤，好容易計啫，亦估到對手可能出乜嘢價，因為傢俬設計及尺寸全由主辦當局決定好，我哋不能修改，只係製造啫。但呢啲傢俬可唔可以在二手市場賣出呢？有冇人買呢？邊個市場會買呢？剩餘價值若干？真係唔知點計，畀主辦當局玩殘，我哋應該出價七十萬加元吖還是六十萬加元？我又唔識博奕論（gametheory），只識英文，難，難，難。」佢唔識，左丁山更加不知所云，唯有叫佢飲多兩杯靚茶，問吓佢如何俾北方佳麗綁實咗。