10月中旬中煤能源（1898）前董事長經天亮退休辭職時，市場已開始揣測，年紀比經天亮大嘅神華能源（1088）董事長陳必亭，亦會喺短期內退下火線。
噚日內地《財經》雜誌網上版報道，揣測已成為事實，原來神華大股東神華集團上周五已經作出內部通報，今年63歲嘅董事長陳必亭退休去職。咁即係話，佢喺上市公司嘅位置遲啲亦會作出相應變動。
張喜武接棒呼聲高
《財經》仲話，最大機會接佢棒嘅，係49歲「年輕一代」嘅神華集團總經理兼神華非執董張喜武，之不過，由於中央組織部仲做緊幹部考察，所以最後委任狀仲未發到出嚟。
張喜武並唔係空降兵，佢95年8月已加入神華集團，之前做過吉林煤炭工業局副局長，同埋東北內蒙古煤炭集團公司副總經理，對煤炭業同神華應該十分了解，完全唔會出現老頂換人，收購合併工作可能因新老細需要了解適應而暫停嘅情況，對神華未嘗唔係一件好事。