香港風流才子夜店啜女，事後自行問責「引咎分手」，無情飛起19年玉女女友，成為城中熱話！咁啱雲達不來梅嘅巴西球星廸亞高亦背住女友，同德國樂壇才女SarahConnor餐廳激咀斷正，才子、波牛都逃唔過美人關！
上月底，23歲嘅廸亞高同28歲嘅Sarah戀情曝光後，德國狗仔隊全天候服侍佢，壓力太大下聯賽對卡爾斯魯厄，叉對手艾治拿條頸被罰停賽4場，提早歇冬。廸亞高球場失意，巴西女友般娜又唔喺身邊，於是上周中約埋上月離婚嘅Sarah撐枱腳，其間咀來咀往，成個過程被《圖片報》影晒！
當晚事發地點喺漢堡EastHotel內嘅餐廳，兩人揀張最埋牆角嘅枱，以避開其他食客注意。講唔夠幾句啫，Sarah就錫埋廸亞高個咀度，廸亞高亦還拖摸Sarah耳珠，仲High到舉高手大叫，引來其他人怪異目光；熱身完畢後，對面嘅廸亞高坐埋Sarah身邊，進行第2輪激咀。
事後趕返巴西箍煲
好戲仲係後頭！兩人食完飯直接去酒店開房，到朝早仲食埋早餐先散Band，可謂罪證確鑿，斷到正一正！風流過後嘅廸亞高收到記者電話先知大禍臨頭：「我冇嘢講，我同Sarah係普通朋友，我女朋友喺巴西。」上周六佢仲急急坐17:45班機返巴西箍煲，臨入閘不忘鬧記者：「呢啲係我私事！」
從香港、德國呢兩單偷食事件，我求大俠認為才子真係枉讀聖賢書，對女友最起碼嘅尊重同責任感都冇。波牛廸亞高雖然讀得書少，但起碼偷食完都識得返屋企！我求大俠希望廸亞高迷途知返，早早同巴西女友拉埋天窗，專心踢好波啦！