要數今年最運滯嘅賓架富豪，東亞（023）寶哥哥李國寶應該走唔甩。不過，外面發生乜嘢事都好，最緊要兄弟同心，其利斷金，但唔知包唔包括埋堂兄弟呢？
連沽兩日套1394萬
華華咁講，係因為噚日睇港交所（388）股權披露資料，寶哥哥堂弟李國仕連續兩日減持東亞股權。
據資料顯示，李國仕喺上個禮拜三，以每股平均價17.33蚊，減持咗60萬股東亞；跟手又喺禮拜四，以每股平均價17.72蚊，減持20萬股，兩日合共減持咗80萬股，令持股量由0.83%降至0.78%，套現咗1394.2萬銀。
對華華嚟講當然唔嘢小，但對李氏家族中人，千零萬就濕濕碎。至於堂細佬點解減持，係咪因為唔睇好股價，咁就唔知囉！
東亞噚日收報16.98元，冇升跌，睇嚟李國仕時機都捉得幾準噃。