童年最大興趣，莫過於撈電視汁！但時代不同，今日好難搵得番咁英雄主義嘅日式卡通；Game界也推出過憑經典卡通省招牌嘅格鬥遊戲，呢次Capcom玩盡三、四十歲朋友至愛嘅龍之子系列，《黃金戰士》、《神勇飛鷹俠》、《小雙俠》重現螢幕，並滲入Wii體感元素！打機？似睇卡通多啲。諗起老媽一句：「你顧得打機定睇電視呀？」
記者：陳國輝
二揪二自創夢幻隊
唔使諗，開機玩第一鋪我肯定會選用黃金俠出擊。唔通貪佢體形笨重，贏面大？當然唔係，仲記得兒時曾經買過好多盒《黃金戰士》迷你模型，可惜永遠都係儲唔齊，尤其是主角「黃金打火機」，零舍搶手；好彩！今次遊戲入面終於有佢份，叫還咗個童年心願，但除咗《黃金戰士》，你仲可同時揀多3名角色加入格鬥，因為遊戲支援4人對打，即係二揪二，最Perfect配搭梗係一邊龍字頭，一邊CapcomFans啦！如果你有玩開旗下格鬥系列，仲可以用類似方式出招二人合作技，上下夾擊，威力勁幾倍㗎！
MiniGame體感波動
打過街機都知佢係一隻格鬥Game，但唔好忘記今次移植落Wii版，又點會咁齋先！體感動作元素當然不缺，特別一提係內置超過10款MiniGames，例如以阿龍為主角嘅「特訓．灼熱波動拳」，佢就要求玩家喺指定時間內不斷出波，擊破眼前出現嘅障礙物，直至當能力值儲滿後，你仲可以利用Wii手掣做指定動作：出灼熱波動拳㖭！
除咗《街頭霸王》有自己嘅MiniGame，其他如《神勇飛鷹俠》、《黃金戰士》同埋《失落的星球》，亦有玩賽跑、射擊等騎呢體感遊戲，仲可以幾個Friends一齊玩，成隻PartyGame咁款！
專用大手掣似打街機
單靠一隻Wii手掣想出連續技Combo，隨時打到痙攣。由於《街霸》、《KOF》等經典格鬥Game，各位早就玩慣街機大掣，所以Wii亦及時推出兩款專用掣，佢哋同樣由Joystick以及6粒掣所組成，唔同嘅係「Exarstick」為純Wii版，設計簡單，至於「龍之子vs.CapcomDreamBattleStick」特別版則印上卡通及遊戲角色，Fans一定鍾意！
名稱：《龍之子vs.Capcom:CrossGenerationOfHeroes》
機種：Wii
類型：格鬥
玩家：最多4人
售價：$398
iGamer（27253338）
