史高拉利同賓尼廸斯呢兩名車路士、利物浦領隊，梗係未聽過哥哥首名曲《H2O》喇，完全唔明白飲水嘅重要性。
「大菲」上周六證實生腎石要做手術，點知賓帥周日晚都係因為有腎石，入咗醫院要搞搞佢。醫生話得呢個病者係飲水唔夠多，英國《太陽報》就講笑話兩位領隊受唔住壓力，先會搞到生腎石。總之，飲多啲水係細路仔都識嘅常識，大家要記住飲水嘅好處喇！
有腎石唔係因壓力大
史高拉利上周六以為自己有心臟病入院，點知check到有腎石，英國《太陽報》就寸佢話前任領隊摩連奴帶隊成績咁好，搞到「大菲」鬼死咁大壓力，亦係生腎石嘅主要原因。單嘢唔夠24小時，即刻傳出另一位領隊賓尼廸斯又生腎石，呢位紅軍教頭周一凌晨已入咗院，喺周一嘅稍後時間完成手術，預計休息幾日就可以復出帶隊。
今屆利物浦聯賽成績力壓其餘Big3排喺榜首，賓帥見好大機會一圓球會18年來嘅聯賽冠軍夢，壓力自然大咗好多。不過，壓力大會導致生腎石嘅咩？我求大俠就覺得好無稽，於是走去問咗香港體育學院運動醫學部嘅黃平山醫生，究竟生腎石嘅主因係咩。
醫生：吸收過量鈣質致病
醫生嘅答案果然係專業啲，唔似得英國《太陽報》亂咁吹。黃醫生話生腎石嘅主因有兩種，其一係太少飲水，其二係食得太多鈣質嘅食物有關，完全唔會關壓力大唔大嘅事。
其實「大菲」同賓帥如果唔想做腎石手術，咪帶定成桶蒸餾水喺身邊，隨時攞嚟飲囉。只要減低尿酸嘅製造，睇怕壓力再大都唔會生腎石啦。另外，我求大俠奉勸大家除咗要不時喝水外，急就要去廁所，唔好忍呀！