轆Book:<br>無頂無門 四輪KTM遊街方程式

轆Book:
無頂無門 四輪KTM遊街方程式

KTM,電單車友一定聽過呢個奧地利電單車名牌。
新車0-100km/h只要3.9秒?OK啦;車重790kg?嘩,拍得住哈利咁重喎;無車門無擋風玻璃無車頂?唓,你第一日見電單車呀?
係,如果X-Bow係電單車,以上規格都唔會嚇呆人,但X-Bow係KTM用德國Audi2.0TFSI偈配意大利Dallara底盤生產嘅四輪跑車!論收視,側面睇似方程式賽車,後面睇似蝙蝠車,我係車主唔戴頭盔戴番個蝙蝠俠面罩,甚麼林寶拉利都要行埋一邊呀!

文:嘴嚼爺
攝:林栢鈞

突破50年歷史

首先講講KTM呢個品牌,可能有好多人知啲唔知啲,其實KTM早於1934年在奧地利創立,而1951年已經生產第一輛電單車R100,一直發展到近年主打Supermoto。
KTM08年開始投產X-Bow首次進軍四輪市場,今年全球生產1,000部,據知到港新車暫時不過5部,即係喺街度見到佢嘅機會,等於撞到劉華朝偉E神倪震周慧敏是但一個咁難。X-Bow好易認,雖然係四輪跑車,但係無車頂無擋風玻璃無車門,只有碳纖車架同幾塊車殼,不過,X-Bow已經喺多個歐洲國家通過撞擊測試,放心,係凉爽啲啫。

■影相時旁邊小巴司機都忍唔住落車影相,仲嘩嘩聲。

■沒有中控台,全部掣集中晒喺軚盤上面。

■好豪氣嘅車主趙先生,當日心急由遼寧趕嚟香港睇部X-Bow。

■影相呢架X-Bow已經裝上過十萬碳纖Option料。

■兩個Recaro座位都設有5點式安全帶,無得拉前退後。

無遮掩震撼速度感

咁嘅款,沿途去影相都不斷惹嚟司機師奶靚仔靚女小朋友狂昅,老實,收視率一定勁過林寶拉利,60幾萬車價抵到爛,無頂無玻璃?咪當自己揸電單車囉!論性能,240hp最大馬力數字上唔算好勁,但係Turbo偈配上只有790kg嘅車重,加速力好強,6前速手波緊密好玩,而且因為無擋風玻璃,就算戴咗頭盔都仍有超強速度感,落場感覺絕非其他超跑可比。不過有得有失啦,避震偏向跑車化,如果我坐喺薄薄一片嘅Recaro上面唱歌,震音應該勁過李克勤。

■雖然無冷氣無音響,但都有免匙系統,㩒掣撻車,條車匙印住Audi四環標誌。

■夜晚喺倒後鏡見到架咁嘅跑車,會以為蝙蝠俠嚟咗香港捉小丑。

■呢個畫面好弔詭,方程式大戰短加長減紅的,買車無八折。

來自遼寧的車主

今次揸出街呢部X-Bow車主係嚟自遼寧嘅趙先生,影相當日佢忍唔住嚟咗香港睇吓自己新買件玩具。「外形很美吧,而且性能也很好,我會把這輛X-Bow運回遼寧。也會駕到賽車場玩吧!」沒有香港車牌,趙生惟有坐吓,「加速力很強,不過那排氣聲太靜!」我天性好奇,喂,趙生,話時話你喺遼寧有幾多部名車呀?「法拉利360Modena、Evolution9代、LotusElise等等,摩托車有一輛哈利、兩輛寶馬,你呢?」我呢?我有超時空要塞VF-1J、機動戰士RX-78、完全變形柯柏文,咁啱都有部360,Xbox360,唉,係啦,咁多玩具邊玩得晒……

■雖然係四輪跑車,都用上KTM招牌鮮橙色車身,另有珍珠白,港機坤哥話:「拆幾塊車殼落嚟,要轉色都唔難啦。」

KTMX-Bow

引擎:Audi2.0直四FSITurbo
馬力:240hp/5,500rpm
扭力:31.6kgm/2,000-5,000rpm
傳動:六前速手波,後輪驅動
車價:$650,000(齋版)
查詢:港機汽車(25122246)