城規會上星期閉門通過,縮減規模嘅合和二期新方案唔使再審議,即係只要運輸署通過交通評估就可以施工。公民黨陳淑莊Tanya一提起城規會咁鬼祟嘅做法就把幾火,認為咁樣放生合和太離譜,一定要啄住唔好放過,聲言會抗爭到底,唔可以咁易過關。
Tanya同街工梁耀忠噚日聯同20幾名環保觸覺成員,喺中環遮打花園遊行去政府總部,抗議政府畀啲發展商打橫行,周圍起屏風樓,阻礙市區嘅通風同光系統,最終令市民權益受損。一眾遊行人士手持裝住黑色氣球嘅鐵籠遊行,抗議政府同城規係黑箱作業,仲呼籲有關當局,唔好縱容批出包括合和二期在內嘅規劃失誤項目。