叫佢做試機碟，應該無人反對。先不談畫質，單就電影名氣、演員級數呢兩瓣，已可引嚟一班途人圍觀！Blu-ray和DVD推出無幾耐，《蝙蝠俠─黑夜之神》基本上屬例播新碟，更出奇係甚少見過一齣電影會推出8個唔同版本，雙碟裝、三碟裝、四碟裝通通玩齊，仲有特別版送Figure𠱁Fans，今期必紅！
記者：陳國輝
攝影：王文忠
8個版本喪玩封面
故事劇情係點，相信唔使點講，大家入戲院已經睇過！反而值得一提係港版碟種類竟多達8款，直頭可用萬花筒嚟形容。先講三碟裝VCD，已經包括咗蝙蝠俠封面同埋小丑封面兩隻版本；高清版Blu-ray就稍為簡單，只得一款雙碟裝；至於DVD最精采，除雙封面雙碟裝呢兩隻版本之外，另外仲包括埋上集《俠影之謎》嘅四碟裝Boxset，以上加埋已經有6款喇！如果你係Batman粉絲，就更應該考慮買限量雙碟版DVD，因為兩種版本分別會送蝙蝠俠面具或蝙蝠俠戰車玩具，但後者售價幾乎$500先落到樓，要收藏迷先買得起喎！
蝙蝠俠Figure有獎
唔係BatmanFans，睇完仲有啲頭痕？唔緊要，無論普通裝DVD或者雙碟裝Blu-ray，碟內已有超詳細BonusTrack，例如葛咸城嘅概念、蝙蝠俠心理分析、新戰衣特點以及片中嘅IMAX場景等，由電影內容到幕後拍攝花絮乜都有。
除咗玩雙封面、送玩具之餘，發行商仲大搞抽獎，小則回答網上問題，就有機會獲贈1:6蝙蝠俠人形或戰車Figure；大則更可憑DVD或Blu-ray碟內嘅表格，填妥後參加52吋全高清電視抽獎。
32吋1080P畫質實試
稱得上做試機碟，梗係要色彩、黑位、光位，Detail位乜都清晰無渣啦！今次，我哋搵咗部新出嘅LG藍光Player同埋32吋全高清電視作測試。
滴汗甩妝都睇到！
小丑打劫銀行，臨走前終於露出「原形」！超近鏡除咗好清楚睇到個妝半甩色外，連額頭右邊滲汗都睇到！
千個人頭逐粒數
呢幕係由過千位外國演員參與的警察大巡遊，畫面精細度幾乎數得出有多少人，絕無賣弄CG之嫌，好震撼！
中環夜色有層次
如未睇過宣傳片，肯定無諗過中環IFC天台夜色靚過平時咁多，點點燈光，層次分明！
Blu-ray
$319（雙碟裝）
特別版DVD
$499（雙碟裝/限量版蝙蝠電單車）
$299（雙碟裝/限量版蝙蝠俠面具）
$339（四碟裝Boxset）
普通版DVD
$169（雙碟裝蝙蝠俠版）
$169（雙碟裝小丑版）
VCD
$65（三碟裝蝙蝠俠版）
$65（三碟裝小丑版）