白鴿黨同前綫合併呢頭婚事，噚日終於有個圓滿結局。帶住50幾人過檔白鴿黨嘅卿姐實在係搵到個好歸宿，因為「外家」對佢呢位新抱仔都算唔錯，唔少人都投票支持佢做新當家，令佢成功以高票當選副主席。究竟卿姐係咪持家有道？當然要留待日後睇佢表現如何，但有女黨員對卿姐就讚不絕口，因為佢係白鴿黨94年成立以嚟首位女話事人，唔再輸蝕畀公民黨黨魁余若薇同自由黨主席劉健儀。
卿姐作為初歸新抱噚日去黨員大會都非常受歡迎；為咗呢樁喜事，佢都着到一身紅噹噹，周圍接受黨員祝福。唔少女黨員都好高興卿姐入閣，除咗覺得佢可以領導群雄，原來仲有另一個特殊原因，就係多咗個女黨員帶唱歌。蔣月蘭大讚卿姐歌喉verygood，以後喺啲鵝公喉歌聲中，就有多一把清音戥番吓。
卿姐仲未識唱黨歌
八方都想聽吓卿姐嘅美妙歌聲，可惜卿姐仲未識唱白鴿黨黨歌，所以成班黨員噚日大合唱時，卿姐都只係口噏噏仲有啲甩甩哋嘴唔係太跟得上，睇嚟佢都要練定兩句行走江湖，以後要喺白鴿黨活動獻唱時都可以壓得住個場，貫徹阿姐風範。
講真今屆議會又好似確實係女性當道，除咗余大狀繼續冧莊做黨魁，自由黨又由劉健儀接棒指揮大局，獨立議員中葉劉淑儀都算巴閉，一單外傭稅問題就搞到政府要做多好多工夫，證明女人真係唔好惹。民建聯至今仲未有女性揸fit人，莫非都係怕咗女人嘅潛在上位力？
自由黨退黨三人組盛傳都係以梁劉柔芬為首領，噚日蘇菲梁就率先爆料，話三人組諗緊用TheIndependents做黨名喎；顧名思義都係想強調佢哋嘅獨立身份，似乎有啲「行貨」。未來TheIndependents成員之一嘅林健鋒就強調黨名仲未拍板，各方有好建議亦歡迎提供喎，唔通佢都覺得呢個朵唔夠震撼？八方奉勸佢哋一句，起新朵一定要先向秘書長登記，否則好似鼠王芬嗰檔「專業會議」俾人話唔知係乜水就𤓓爆。
mailto:[email protected]