總獎金超過440萬港元嘅第二屆超級盃麻將大賽，噚日喺澳門金都賭場舉行決賽，嚟自台灣嘅參賽者最威水，唔知係咪比賽打台灣牌嘅關係，比賽前四名都係台灣人，冠軍仲一人獨得獎金257萬。至於香港選手成績就麻麻，最叻嗰位第九名。
獨得獎金港幣257萬
出爐雀后王韻涵啱啱30歲出頭。有啲人會着住紅底褲打牌嚟邪住對手，佢喺比賽時就經常攬住個紅色枕頭，呢招好有效，決賽唔夠兩粒鐘就分到勝負，枕頭妹比第二名多300幾分，拋離幾條街，「我沒有想過會拿冠軍，大概是好運氣吧。」佢話平日只係同家人朋友打吓衞生麻雀，冇諗過就咁練出稱霸雀林嘅本領。
今次麻雀大賽，內地、台灣、香港同日本等地有超過四萬個雀林高手參賽，單係初賽至前日舉行嘅決賽周，就用咗近半年時間。到噚日下晝大會宣佈王韻涵攞到冠軍，佢比賽嘅冷靜即時冇晒，激動到同專程由台灣飛去澳門打氣嘅兩名好友攬住喊；做雀后可以獨得獎金港幣257萬，對失業半年嘅王韻涵應該好有幫助，「有了錢也不可以不做工，但我一定會更努力去找工作。」佢話唔會做金融海嘯下嘅失敗者。