人氣電台節目《嘩！嘩！嘩！打到嚟！》上月變陣，由大笑姑婆吳君如率領靚仔文人王貽興、新面孔阮子健攜手主持，擦出火花，獲聽眾支持。時值金融海嘯，股市仆直、公司恐嚇裁員，當積聚的戾氣無從化解，有「怨」無路訴之時，每晚深夜總有人為大家出氣，一切寃屈盡付笑談間，雖未必能解決問題，但至少也能變成笑聲，望君哈哈大笑之後，一覺到天明。 撰文：藍文浩、簡雪瑩
商台節目《嘩！嘩！嘩！打到嚟！》三位主持晚晚笑唔停口，吳君如率領寫小說寫到得文學獎的王貽興，還有新面孔、被網友爭相起底的阮子健。《嘩！嘩！嘩！》每晚午夜開咪，笑足10年，君如坦言為人母後突然覺得原來肚子裏有一腔使命感。
君如依然以挖苦自己為樂，她日前說：「我生BB之後停工，你知湊BB要兩個鐘起身一次，餵奶畀佢，嗰段時間好攰，有日聽到林海峰佢哋做《在晴朗的一天出發》，我好感激咁同佢哋講，好彩有你哋，因為我深深體會到好多人生活好枯燥，係聽電台節目消遣。我做電台除咗為自己唔好咁悶同有人工之外，其實仲可以造福人群。」
硬搶靚仔王貽興
《嘩！嘩！嘩！》主持一代又一代，原來每一次人選都是君如親自決定，她說：「今次應該係10年來第一次宣傳，覺得係時候介紹啲新血畀大家，我覺得呢兩條𡃁仔都有啲前途。其實電台收聽率一向好穩定，唔使除衫唔使着三點式。但係感覺好親切，好似晚晚同大家傾偈咁。既然班聽眾一路冇走過，咁不如重視吓。」
問到如何找來王、阮兩人時，君如笑說：「其實之前同杜汶澤真係幾夾，可以窒嚟窒去，但係咁多年來嘅拍檔都係社會大學畢業，應該搵番啲識字嘅。阮子健之前做資訊節目《杏林茶》（商業一台），明明好悶嘅題目佢又講得幾好笑，轉數快又唔怕俾人窒係最基本條件。」
君如續說：「王貽興就純粹係因為靚仔，冇其他理由，我做咗10年點都應該有少少甜頭啦，哈哈哈。叫劉德華實唔睬我，於是嗌高層落去截佢。聽到佢冇簽TVB好開心，因為簽咗就好易被限制住。一般讀得書嘅都唔會靚仔，而靚仔嘅又唔讀得書，王貽興就難得讀得又睇得。」
ECup蛋糕贈拍檔
王貽興其實一早出現少爺占的節目，今次出現在《嘩！嘩！嘩！》，他也有他的想法，王貽興說：「有時有啲時事嘢，我哋講完聽眾有共鳴，有乜谷氣我哋代佢哋拍枱先，笑完之後起碼可以化解多少，但係如果一直鬧可能會更加負面，咁不如圍埋一齊笑吓，試吓改變主觀情緒都好呀。」
產女後重出江湖，君如繼續口沫橫飛，她說都是為了自己：「其實我真係為自己，第二先係為聽眾，起碼𠵱家有一個地方畀我開心先，仲有錢賺同埋可以訓練到自己個腦。之前生完個女，停咗一段時間，長毛（陳可辛）就日日投訴，叫我返工，話我反應慢咗好多。我覺得咁樣落去唔得，要的起心肝，要有啲細藝。我本來以為我會成日講個女，但係到後來發現返工嗰陣唔記得咗個女，原來我分得開，我唔係我個女個阿媽，都唔係一個師奶，係一個有主見嘅主持人。」
說到合作以來最開心的，三人大笑，原來是11月13號阮子健生日時，吳君如做了一個Ecup美少女的生日蛋糕給他。
攝影：陳志嵐
網友狂起阮子健底
首次轉做較輕鬆的節目，阮子健被一眾網友瘋狂起底，求相、求資料者眾。在旁的三姑（吳君如）知道即狂笑再即時上網求證，一臉溫文的阮子健說：「夾咗幾個星期𠵱家可以用順同爽形容，第一次合作其實都唔知點解會搵我，《嘩！嘩！嘩！》成日聽，都會驚究竟同君如一齊做會點樣，因為同之前嘅時事節目好唔同。」
曾經留學，讀過人類學的阮子健續說：「做電台如果可以用說笑嘅方式將真相變得easy，就可以將負能量整走，真係所謂化戾氣為祥和，化腐朽為神奇。以前主持其他節目，礙於節目嘅性質，好多時好深入嗰句講唔到，但係喺《嘩！嘩！嘩！》度我可以真係講到我想講嘅嘢，而其實我好深入嗰句，就係好多人心入面最想講嗰句。」
