「女人嘅身材係資產，要好好保養㗎。」《珠光寶氣》三妹呢句說話真係好啱，雖然我唔係恨嫁入豪門，但每個禮拜都做facial、修甲同按摩。最激氣係，我買咗香港化粧品中心嘅療程套票，但佢上個月執鬼咗，轉幫趁ELBEAUTE，點知又執埋。
做法互惠互利
不過，好在之後有幾間美容中心話肯接收我哋呢班客。美容業總會率先出嚟話，佢哋嘅部份會員機構願意義務為受影響顧客提供協助，包括有條件完成餘下嘅美容療程，例如額外畀數十至一百蚊，可以打熱線：35792579查詢。香港健康美容同業商會都話，屬下唔少美容院都肯提供援助，為受影響顧客提供未完成嘅美容服務，有需要可以周一至六朝十晚七打熱線：63404570。「華洋坊」仲話，買咗美容中心療程套票嘅，可以免費享用指定的療法一次，可以打去熱線：21866111問吓。
不過，美容業總會主席葉世雄話，其實呢啲都係互惠互利，因為顧客網絡對美容院好緊要，雖然𠵱家蝕底少少，但就可以多咗批客，如果個客滿意服務，以後就有更多生意做。我就希望其他公司效法，例如百老滙、Giordano，願意幫買咗泰林、U-Right嘅現金券顧客啦！
逢周日刊出
電郵：mailto:[email protected]