人人睇淡前景，出年經濟恐怕冇運行，煲呔話要「四保」，保命、保本、保工、保信心，又要「士象全」，唔好俾人將軍，否則香港有排衰。因此佢開水喉一擲千億救經濟，噚日再放小小水，掟多一萬蚊救市，行工展會半小時使咗過萬元，係近年罕有大手筆消費。
對輕工業產品冇興趣
八方前日見到曾太一個人行ifc，不過冇乜收穫，原來留番噚日同煲呔一齊喺工展會「血拼」。佢哋循例先參觀介紹香港工業製品嘅香港產品館，工作人員落力講解，不過好可惜，煲呔應該聽唔入耳，因為佢一味想香港做國際金融中心，對黐膠花、手電筒呢啲輕工業產品邊有興趣？走馬看花望幾眼就走人啦。
行工展會戲肉梗係掃貨，煲呔去到嘉頓攤位，買咗50包「開心禮物包」，總共2,150元，之後去買電器，入咗兩個荷媽做代言人嘅「光波萬用煮食鍋」，總共2,360蚊，加多兩蚊以優惠價換購埋兩個暖爐。
電器公司老闆見煲呔執平貨心切，趁機向佢推銷一款聲稱未推出市面嘅「三合一焗爐」。呢嚿嘢同時具備微波爐、一般焗爐同蒸魚功能，似乎好犀利，煲呔聽完果然心動，加上老闆平1,000蚊賣畀佢，煲呔即時畀3,200蚊，貨銀兩訖。
掃咗幾千蚊貨仲未夠喉，煲呔兩公婆行到去中式即食麵攤位，好似一般師奶咁試食吓先。特首駕到，工作人員好識做，八方見試食嗰「杯」麵都份量十足，雖然煲呔邊食邊嗌好熱，但三扒兩撥就食晒，之後買咗3,000蚊麵，真係咁好味？
往年只象徵式買少
計一計時，煲呔喺工展會行咗大約半粒鐘，埋單計數，總共使咗10,712元，據講佢會將部份「戰利品」送去老人院做聖誕禮物。
煲呔往年行工展會冇咁豪，一般只係象徵式買少少嘢，舊年花100蚊幫襯社企買條腰帶。工展會主辦單位、廠商會會長尹德勝話，特首今年大出血，相信係想以身作則鼓勵市民消費，希望振興市道。面對經濟衰退，煲呔放少少水，花一萬幾千元帶頭消費實情無補於事，好多人認為政府開大啲水喉仲實際。
mailto:[email protected]