近排最常聽見嘅新聞，唔係減薪就係裁員，莫講話年尾流流，任何時候睇怕都冇乜邊個打工仔想聽到呢啲新聞。不過，做老闆嘅要survival，減薪裁員削支出難免，呢方面打工仔惟有聽天由命。
謹記臨危不亂
不過，雖然話打工仔好被動，但敏妮始終覺得人即使未必能勝天，但總要對自己有個交代。記得冇幾耐之前，敏妮要應付一個專業試，喺一眾應考嘅同學口中，最困難應付嘅唔係試題有幾高難度，而係時間控制，基本上每題只係得一兩分鐘畀你了解題目兼計算或者揀選啱嘅答案，稍為「諗多咗」或者「計耐咗」，就會唔夠時間。敏妮就係因為「諗多咗」所以搞到時間失晒預算。
敏妮都係凡人，面對考試都未能做到從容不迫，何況睇住個錶，已經唔夠時間做試題，個心一急，大腦function即刻受影響，越急越亂，越亂越急，突然間腦海出現一個念頭，「橫掂都唔夠時間，不如全部撞晒一個答案，聽天由命啦！」
不過，呢個念頭只係匆匆閃過，再望吓隻錶，敏妮當時同自己講，都仲未到「山窮水盡」，咁快靠個「天」，對唔住自己噃，結果深呼吸一吓，叫自己冷靜，以平常心逐條試題計，直至主考官講「lastfiveminutes」，先至再算。
撐到底莫放棄
睇到呢度，相信會有讀者想知敏妮究竟有冇pass，其實結果唔重要，敏妮只係想同各位打工仔打打氣。
金融海嘯冲擊各行各業，就連敏妮都唔知自己會唔會被裁走，與其數日子做人，不如咬實牙關同時間競賽，講到尾呢個時勢，大家都係為咗survival。
溫敏妮
http://wanmanli.com/blogs/