經濟前景不明，看淡者多。最新一期《財富》雜誌搵咗八位專家預測○九年市道，左丁山收到雜誌之後，仲未得閒睇，次日（十二月十二日）各大報章已經紛紛繙譯轉載，《蘋果》財經版做得最大，耶魯大學嘅名教授舒拿話杜瓊斯指數會見四千點，認真嚇人，大抵淡市時多人唱淡，好市時多人唱好，只有真正有勇氣有原則之人先至膽敢逆市而行，例如波浪許，又稱天真許，皆因佢有一份純真，夠膽睇好Ａ股大旺市也。
午飯時刻，餐廳羅講起佢啲外籍朋友，凡有expat身份者，最近都周身唔聚財，住豪宅由公司交租十五萬元以上嘅，更驚提前畀公司送回祖家，佢哋睇住間間大行裁員，唔知幾時輪到自己也，既有此心結，當然唔夠膽在聖誕季節豪放消費。餐廳羅話有一啲大公司已下令僱員出外公幹，要盡量坐經濟艙，呢一點並非新招，大家可以接受，新招係去到外地，唔准住五星酒店，一定要住四星，即使房租相同也不例外。呢點令左丁山不明白，譬如假設曼谷半島酒店收每晚二千，曼谷LandmarkHotel酒店又係每晚二千，有乜理由唔住半島呀？
餐廳羅話：「此乃公關形象問題，大公司要畀外人特別係傳媒得到一個印象，佢哋已在努力慳錢，否則呢邊大裁員，嗰邊高層出差竟然住在半島或文華東方，實會畀人鬧。傳媒或公眾邊會去查清楚，五星豪華酒店大減價吖！」咁又係，呢啲就係做公關騷，英文所謂tobeseen──公司節儉，人哋見到你入住曼谷文華東方就會話你花錢，不如就入住大路貨AsiaHotel啦，包冇人話你亂用公家錢。
如果間間公司都咁做，啲大名牌豪華酒店咪好弊？估唔到金融海嘯會為超豪酒店帶來新難題㖭。記得好多年前向酒店大師AdriaanZecha請教，做酒店點解一定要超豪？Zecha話：「有兩點，第一，大型酒店凡有四百間房以上，好難做到服務無微不至；第二，我哋經營超豪酒店每晚收房租五百美元，到咗經濟不景時，收每晚二百美元嘅話，一定可以保持入住率，維持到競爭力。」Zecha素來睇得準，或者連佢都估唔到，𠵱家有人為了公關形象，唔計錢都要入住三四星酒店。