孽吻焚情之處處留情--倪震本月初背女友周慧敏在蘭桂坊偷食，啜爆21歲城大辣妹張茆，才子形象即時破產，並與周慧敏分手收場。自稱有中年危機的倪震，近年專𠝹𡃁妹仔，對象包括內地名模裴蓓及嫩模Esther，連穿三點式參演電影《出水芙蓉》的23歲樂壇新人羽翹也不放過，才子前輩蕭若元前晚爆料指倪震在酒吧認識羽翹後，透過facebook狂媾她，看來倪震人生最大的成就，非𠝹女莫屬。
倪震與張茆的火辣濕吻，啜斷了他與周慧敏的19年情，連日被翻情史舊賬的倪震據知正在內地避世。他上周四在分手聲明中自稱有中年危機，未知可是這原因，他近年貪戀年輕美女，先有24歲的嫩口模特兒Esther，後有同為21歲的裴蓓和張茆。蕭若元繼日前踢爆倪震的媾女榜後，前晚在旺角的變靚D周年晚宴上再次爆料，指倪震於半年前在酒吧獲其子蕭定一介紹認識旗下現年23歲的新人羽翹後，便經常透過facebook網站媾羽翹，兩個禮拜前還相約她見面。
前輩狠批
「唔係篤波就係媾女」
問蕭若元可知倪震的追女名單時，他抵死地說：「比現實知嘅長10倍，佢正經事唔做，幾年前佢同我講過好想喺寫作上有成就，但5年嚟寫過啲乜嘢？以佢聰明才智，可惜浪費生命。年近半百，一事無成，做埋啲九流雜誌、電台節目，唔係篤波就媾女。」倪震繼被爆透過facebook網站約會內地名模裴蓓後，蕭若元前晚又爆他用同樣伎倆狂𠝹羽翹，他說：「佢不知幾咁努力，日日上facebook。」
蕭若元謂希望倪震可以反省自己，他說：「一個不幸俾車撞死咗，佢都46歲，加埋天地人，即49歲，同王維基差唔多大，仲後生仔咩？死不為夭，佢浪費才華。」問到蕭若元平日怎樣教仔？他說：「冇喎，作為父親嘅唔會希望仔女點，但佢哋要對生命負責，每個人都應該知自己做緊乜嘢，唔好到死嗰一刻，人哋覺得你死得太遲，生前累朋友，死時累街坊，總之一生人浪費時間，佢鍾意咁就咁。」
至於羽翹則表示從未與倪震單獨約會，她前晚說：「兩個星期前我哋仲喺facebook交談過，佢有約我去街，但同佢唔熟，所以冇去，我禮貌上話遲啲約食飯。」可覺倪震有追求之意？她說：「唔算，我只係覺得佢交遊廣闊，好多朋友，係社交禮儀。」倪震可有稱讚她靚女？她說：「有，但覺得佢係禮貌上。」羽翹又謂很欣賞周慧敏，大讚她的玉女形象非常成功，她又說：「佢同倪震都係前輩，我好欣賞佢哋。」羽翹指有將倪震邀約一事轉告蕭定一，他謂任由她自行決定，但倪震自爆出與張茆夜店濕吻後，已沒再跟羽翹聯絡。
蕭定一昨日直認半年前介紹羽翹給倪震認識，他在電話中說：「嗰次我同羽翹、Freeze一齊去咗巫雨平嘅酒吧玩，當時倪震都喺度，我咪介紹佢哋識。」其間倪震可是對羽翹特別嗒糖？蕭定一說：「相對羽翹，佢對Freeze就冇咁殷勤囉，呢件事都隔咗半年，最近聽羽翹提起先知佢哋有聯絡，其實我唔反對佢哋做朋友，但最唔開心係明明我介紹佢哋識，但倪震就背後講我壞話，咁樣好影響我嘅工作，佢嘅人格真係好有問題。」
艷照熱爆
蕭定一願即簽張茆
對於倪震不事生產，終日只顧媾女，蕭定一狠批道：「佢係唔會滿足，佢當啲女係錢咁，就算用100億嚟比喻女友周慧敏，佢雖然搵夠100億，但仲唔會心足，貪念太重，唔明佢咁後生點解唔肯拼搏，或者佢份人怕輸啦。」
張茆艷照網上熱爆，蕭定一謂有意羅致她成為旗下藝人，他說：「佢好有條件入娛樂圈，𠵱家我都透過朋友聯絡緊佢，好想見吓佢真人，佢肯簽，我會即刻簽佢。」
倪震交友網廣泛，據悉曾有一段時間他瞞着正印女友周慧敏，跟張玉珊及黎姿過從甚密，記者昨日致電張玉珊求證，她說：「我16歲上下就識倪震，當時佢本《Yes！》雜誌成日會搵我影相，因為合作關係成日會同佢見面，同佢真係傾到偈嘅朋友，我同佢冇拍過拖，只係保持好朋友關係，我識佢嘅時候，佢已經同周慧敏一齊，𠵱家佢兩個要分手，我都戥佢哋可惜，不過呢啲係佢兩個人嘅事，旁人最好唔好講咁多嘢，畀番啲空間佢哋。」
採訪、攝影：魯萍、葉雪
人物誌：鋼琴才女水着出道
倪震被踢爆利用facebook力𠝹的女新人羽翹（Ava），現年23歲，原名廖羽翹，是無綫高層何麗全的世姪女，今年3月挾整容三嬌Freeze師妹之名進軍樂壇。羽翹中學畢業於英華書院，會考獲20分，為港大生物系學士，並具八級鋼琴資格，堪稱才女。
羽翹入行前曾參演鍾欣桐和方力申主演的電影《出水芙蓉》，至今年3月始加盟蕭定一旗下，簽約10年，走清純路線的她預計明年出碟。
話你知：媾女成就勝事業
身為名作家倪匡之子，倪震的事業成就與父親差之千里，近日更因背着女友周慧敏搭上城大辣妹張茆，輿論一面倒「倒震」。
倪震一直以來的賣點是有點鬼才，有點點腦筋，但多年來為人數得出的成就，只有91年創辦的《YES!》雜誌，主持過幾個電台節目如《三個寂寞的心》及近年的《絕情谷》，也寫過幾個報章雜誌專欄，據知90年代杜琪峯曾邀他一起合作寫劇本，結果也是冇米粥沒成事。
愛打桌球的他近年開設了一個桌球室，事業成就僅此而已，反觀他多年來偷食新聞不絕，足見事業成就不大的他，擁有最多的便是時間，得閒無事便四出媾女，終於媾出禍，聲名全喪。
倪震右臂罹患怪疾
避走內地的倪震早前曾在雜誌專欄「倪震有話說」中，透露其右臂自8月中開始，突然不能彎曲，手掌更不時腫起，疑是患了網球肘，最嚴重時更完全不能動彈。他表示曾驗血及照X光，但仍無法找出病源，及後接受物理治療，可惜無甚進展，並透露其老父倪匡非常擔心，隔天就致電追問病情，他又寫道：「（倪匡）見我過了個多月還是獨臂刀，竟建議我索性做手術把臂截了，安義肢，亁淨利落。甚麼人來的？」
多戀事：𠝹女版圖無疆界
倪震與周慧敏拍拖19年，愛情生活仍然多姿多采，由86年與李嘉欣相戀開始，女伴如走馬燈，90年代是其追女和《YES！》的全盛時期，兩者關係不言而喻。當時倪震利用雜誌狂捧女友之餘，又暗𠝹其他女星，周慧敏於92年曾提出分手，兩年後終感情破裂，倪震轉投港姐冠軍陳法蓉懷抱。至於其女友或有意追求的女性個個猛料，有選美冠軍、當紅女星、已婚名媛、模特兒及玉女歌手。
資料來源：《蘋果》資料室
