股神畢菲特9月底斥資18億銀，入股比亞廸（1211）一成，消息傳出當日，比亞廸股價一度急升近一倍。原來畢菲特老友、微軟前主席蓋茨亦喺今年第三季，靜靜雞增持內地音響股廣州國光。根據公司第三季報告，蓋茨旗下基金Bill&MelindaGatesFoundationTrust成為國光前十大流通股東，持有83.8萬股，排名十大尾席。
國光曾升45%
呢間廣州國光，專做音響零件同揚聲器，公司有五十幾年歷史。據《華夏時報》報道，蓋茨基金會計劃投資約1億美金喺內地A股，聽講佢專吼經營傳統行業嘅股票，所以入股呢隻老字號。
得到蓋茨垂青，廣州國光雖然冇「升價十倍」，但股價由10月低位，都曾經一度急彈四成五，無懼金融海嘯，成為跌市奇葩，蓋茨魅力唔講得小呀！