湯告魯斯（TomCruise）噚日上咗名嘴JayLeno嘅節目度做訪問，當日佢心情靚爆，鬼死咁high，仲大晒家庭幸福。
靚佬湯被問到會唔會考慮學老婆姬蒂荷姆絲（KatieHolmes）咁做舞台劇，靚佬湯話自己鍾意做戲，但都想參演音樂劇，仲即場大展歌喉，扭身扭勢唱貓王名曲，投入程度令人意外。
一向鍾意晒幸福嘅靚佬湯，當日仲帶埋自己喺屋企扮聖誕老人，同埋老婆到片場探佢班嘅相畀人睇。
另外，靚佬湯近日憑《雷霆喪星》（TropicThunder）獲提名金球獎最佳男配角，佢話好鍾意自己個爛口電影監製角色，仲同賓史廸拿（BenStiller）研究為呢個角色開拍電影嘅可能性。