一場金融海嘯，拉窄香港嘅貧富差距，英超聯何嘗唔係咁呢？一向以「要最好、要最貴」為轉會宗旨嘅車路士，日前傳出1月轉會目標，分別係韋根前鋒希斯基同保頓前鋒奇雲戴維斯！呢啲貨色車仔以前點會睇得上㗎？簡直係同李浮雲迫巴士一樣咁神奇！
鬼咩！俄羅斯股市總值蒸發近六成二，車仔老闆阿巴莫域治身家亦唔見200億美元（約1,550億港元），如果特區富豪蝕幾十億就激到入院，阿巴咪晨早去見阿里巴巴？阿巴又點會咁渣，佢好快冷靜落嚟，唔畀女友去CitySuper、馬莎百貨買嘢，轉去「百雞」超市、鴨寮街買cheap嘢！
「大花灑」車路士亦要即刻裁員止血，幾乎負責所有足球事務嘅老友晏尼臣都就嚟執包袱，更何況轉會市場？中鋒杜奧巴屢向國米教練摩連奴示愛，史高拉利都要搵定接班人，結果就傳來斟希斯基同奇雲戴維斯嘅消息。其實，史高拉利講過想買羅賓奴，但今時今日咁環境，都係唔好發白日夢啦！
睇中希斯基奇雲戴維斯
30歲嘅希斯基話晒都係英格蘭國腳，但31歲嘅奇雲戴維斯就咩銜頭都冇，但兩個人加埋可能都係600萬鎊啫！正如車仔內部人士所講：「佢哋雖然未必入得多波，但同樣可以為對手帶嚟麻煩！問題係，洗腳唔抹腳嘅時代，已經一去不返囉！」係囉，西瓜刀係刀，開信刀唔係刀咩？
唉！我求大俠都替「大菲」史高拉利唔抵，一加盟就遇上阿巴玩制水。大家咪話我危言聳聽，阿巴呢鋪好難翻身，因為契大佬普京趁火打劫，低價贖番俄羅斯超級富豪啲資產。因此，就算俄羅斯股市回升，金融危機過去，阿巴嘅財力都會今非昔比，「大菲」要有心理準備做慳家主婦啦！