餐廳羅講起一啲大公司唔准出差高層住在名牌大酒店，例如一大堆名字，大家可在金鐘、中環見到嘅，相信呢類酒店都為之啼笑皆非。以前經濟即使差勁，公司仍有自主權，但現在好多美資大銀行接受政府注資，即係收納稅人嘅錢，故此不少企業對公關特別敏感，最佳例子就係三大車廠高層以前坐私人飛機去華盛頓，飽受批評，故此十二月初去華盛頓就改坐汽車，仲要係環保混合車，以示政治正確，但以事論事，佢哋咁鬼貴人工，坐車由底特律去華盛頓，實在係浪費管理人時間（managementtime），成本高昂之至，但係為公關而公關，不必顧及成本。
三大車廠頭頭唔敢坐商業客機頭等或商務艙甚至經濟艙，可謂一葉知秋，航空公司當然有難。難怪新加坡航空公司話新年及農曆年（一月）後，機票預訂數量大跌，係九一一及沙士之後最慘淡嘅，國泰亦透露十一月份載客人次下跌百分之二點二，頭等及商務艙跌得特別多。經濟艙相等於酒樓午市，坐滿人都只係維到皮費啫，晚上酒席及晚飯（商務及頭等）生意慘淡嘅話，點會賺錢？
點知與餐廳羅講完就碰到外匯Ｍ，佢話農曆年或一家四口去拉斯維加斯玩，以為買機票好輕鬆，點知唔係，佢兩公婆坐商務艙，仔女坐經濟客位，四張機票來回三藩市加轉機去LV，差唔多要港幣二十萬，佢話國泰航空趁淡市搶錢，要寫寫佢。左丁山大笑：「人人都話慳錢，你就做大豪客去LV，仲要坐商務客位㖭，抵國泰賺你一筆，幫補吓。不如將你個名話畀國泰聽，等佢哋招呼你好啲！」外匯Ｍ即刻話費事，佢係咁意呻吓啫！
外匯Ｍ算係跌市奇葩，點解咁掂？外匯Ｍ話外匯市場波動慣，人客慣咗又沽又買，唔似得股市咁，散客與傳統基金只會買，不會沽空做淡倉，股市即使大跌對外匯市場毫無影響，炒匯與炒股完全係兩批人，近年多咗好多大陸炒家，炒匯勇到無倫，美元大起大跌，佢哋仲更加炒得高興，故此外匯Ｍ生意不愁，懶理股市樓市不景。既然如此，佢家人農曆年到LV睇騷與在賭場玩幾手，二十萬元機票係小事啫。