汪明荃（阿姐）、曾志偉、關菊英（菊姐）、曾華倩今年都會為慈善節目《歡樂滿東華2008》做主持，貪玩又口多嘅志偉之前喺台慶先後辣㷫阿姐同菊姐，噚日喺將軍澳電視廣播城拜神時，志偉識趣收斂，捧住盒燒肉到阿姐面前合照，馮仁昭見阿姐影完相後嘴角一藐，奈佢唔何咁款，事後志偉話：「唔同阿姐合作邊有大騷做，佢呢啲眼光只係會對家英哥同我㗎咋。」志偉仲話會繼續同阿姐開玩笑：「會玩，乜嘢唔玩吖，我哋咁多年都係咁，歡喜寃家。」
「65歲多500蚊」
阿姐近日想為八和會館申辦成慈善機構煩惱，有會員擔心福利減少，阿姐實行以派錢作定心丸，佢話：「過往農曆年會派發200蚊福利畀會員，今年遇着金融海嘯，𠵱家決定提前今個星期日派福利，65歲以上老人家可額外多500蚊，因為今年八和籌到錢，使番落老人家身上好應該，到時會同啲老人家接觸同解釋，而19號會投票通過贊唔贊成將八和轉為慈善團體。」
另外，有指菊姐主唱《溏心風暴之家好月圓》主題曲《無心害你》係今年無綫內定攞金曲金獎，菊姐話：「套劇今年有成五十點收視，計多人識同hit呢首歌都好受歡迎，得獎都唔算係冷門，有可能㗎。」