上演《大耳仔走天涯》，勾起我心中一個不解之謎，經過寵物舖，見到一隻又一隻的龍貓，成個鼠樣，但點解叫貓呢？唔係鼠但點解又咁得意？仲傳聞隻隻身價過千兼有潔癖㖭？唔係貓科，唔係鼠科咁究竟搞邊科先，好，等我問吓古巨基先。
記者：蒙為亮
攝影：陳陶鈞
飼養費每月$300
打電話問過古巨基，Sorry，佢都唔係好知，惟有請龍貓界高人Jester指點迷津，「龍貓屬齧齒類動物，好似松鼠、倉鼠咁，一年三百六十五日都會生長牙齒，所以要經常磨牙，佢哋夜晚先出嚟玩，日頭瞓到成隻豬咁，十足十夜晚看更。龍貓每個毛孔都有60至80條毛，毛孔太多所以唔可以濕身，飲用水都好嚴格，一般自來水唔啱龍貓飲，因為加咗氯氣兼有金屬成份，佢哋只可以飲雪凍咗嘅礦泉水，除適當糧食外，龍貓仲需要一條磨牙木，否則佢哋會磨爛其他嘢。仲有，你一定要抽時間同龍貓玩，增進感情係必須嘅，仲有……」
仲有仲有？得得得，我忍唔住打斷Jester，仲有咁多嘢，會唔會好重皮先？「哈哈，唔會，大概每個月$300，相比其他寵物，龍貓已經算好易養得起，當然要有愛心啦，呢樣先係無價。」龍貓唔似倉鼠咁，生一竇仔女有成十幾廿隻，到頭來無人要焗住越養越多，「呢方面龍貓的確易處理，龍貓仔一胎平均有兩至四隻，生得太多反而唔好，因為唔夠營養Afford四隻BB，生出嚟嘅BB會有缺陷，例如我其中一隻最鍾意嘅夫仔，生咗隻BB叫牛牛，牛牛就天生無咗隻眼，好可憐。」好彩，牛牛今時今日已經6歲，而且仲肥肥白白，不知幾得意。
學懂珍惜寵物生命
Jester係龍貓店老闆，1997年大學畢業後開始愛上龍貓：「想當年行寵物店，對龍貓一見鍾情，當年一隻龍貓身價超過$4,000，對於啱啱畢業嘅我嚟講好貴，要同女友儲好耐錢先買得起，可惜嗰陣自己唔係好識養，所以無幾耐，隻龍貓就消失咗……」我八卦問：「咁段感情又有無隨住龍貓嘅離去付諸流水呢？」Jester笑：「無無無！當年嘅女朋友，已經變成𠵱家嘅老婆仔。我係個好長情嘅人，嗰次養死咗隻龍貓，我學識更加珍惜寵物生命，所以不斷睇書同睇外國Forum，希望了解更多養龍貓秘訣。」隨住知識越多，Jester家中龍貓數目亦越來越多，不知不覺就養咗十幾隻，所以索性開舖頭，「估唔到啦，估唔到𠵱家間龍貓舖頭又養番我同我老婆，的確因果循環。」奉勸各位主人，在養寵物之前請三思，善惡到頭終有報呀。
龍貓同貓唔係Friend
同龍貓影完相，忽然諗到個無厘頭但又好想問嘅問題：「明明係老鼠樣又點解叫貓？搞Gag？叫得做貓，咁龍貓同貓又會唔會好Friend呢？」Jester話：「千祈唔好放龍貓喺貓旁邊，否則龍貓仔條命，一定斷送利爪之下，小心小心。至於龍貓呢個名，係由英國引入龍貓嘅第一人Hawood改嘅，佢個樣儍頭儍腦，顏色又灰灰黑黑，當時《龍貓》呢套電影又喺香港大賣，所以就改咗呢個名，一直沿用至𠵱家。」我覺得龍貓除一身毛色同長鬚外，最搞笑係有個大肚腩，行路嗰陣個樣好笨拙，十足十一個大肥佬，所以討到女仔歡心。
Fans教路
Carol：「龍貓壽命一般有十年以上，養前要三思，千祈唔好養養吓唔養，咁樣好唔負責任。」
老闆Jester：「龍貓有潔癖，佢哋唔可以濕身，所以一定要用冲凉粉同佢哋日日冲凉。」
Jasper：「溫差變化大，龍貓好易病，室內溫度應該經常Keep住24℃，龍貓仔先會住得舒舒服服。」
必需品Checklist
龍貓屋約$100-300
除糧草外嘅必需品，龍貓屋體積要夠大，木製、塑膠或瓷器製也可，要佢哋安心喺屋仔睡覺。
水樽$78
最好選擇玻璃水樽，唔怕被龍貓咬穿，兼可以放入滾水徹底消毒洗淨。
亁草$58
龍貓主要食糧之一，必須每天供應，亁草作用係補充龍貓所需嘅蛋白質同維他命，兼幫助消化。
磨牙木$14
龍貓牙齒會不斷生長，故經常磨牙，所以一支半支磨牙木少不得。
主糧$55
Mazuri龍貓主糧，成份包括脂肪、蛋白質同纖維，成年龍貓需進食含高纖維、適量碳水化合物同蛋白質嘅食物。
冲凉粉約$70
龍貓愛清潔，所以記緊勤啲同佢哋冲凉，龍貓一定要用冲凉粉冲凉，唔可以用冲凉沙。
寵物蛋
地點：油麻地彌敦道530號現時點商場2樓242-3號舖（23323123）
網址： http://www.petegg.com