三歲定八十，小時候背着書包上學的Angelababy（楊穎），已經日日穿老竇時裝店的新衫返學當行時裝騷。現在做了潮流icon的模，Angelababy日前接受本報專訪時表示因香港市場細，故已轉攻日本市場，她說：「去銅鑼灣通街都係自己個樣，睇到都悶！」 撰文：吳佩思
日日見報都是「ECupBaby」劉欣宜，幾乎忘了還有個「ACupBaby」Angelababy，咁啱cup數真是32A。做模特兒，cup數同級數不一定成正比。ECupBaby還在拋胸爭見報，Angelababy已成功開拓日本市場，她說：「日本只係啱啱起步，因為當地好啱我哋呢種身材嘅model。𠵱家學緊日文，酬勞方面，日本梗係多過香港啦。」最好笑還是經常遇上星探，證明她真係好「㗎妹」。
返學好似行騷
Angelababy這個多月大部份時間穿梭日本、泰國和內地，最近還在泰國為某大品牌護膚品拍廣告，好快當地周街都會見到她的靚樣，一如早前香港通街都是她代言的廣告一樣，她說：「香港市場好細，我怕觀眾見得多都厭。試過去銅鑼灣，見到通街都係自己個樣，睇到都悶，寧願啲廣告慢慢出。」
Angelababy注定吃這行飯，細細個已經日日行騷，她說：「爹哋做時裝生意，細個喺上海讀書嗰陣，唔使着校服返學，所以成日攞舖頭嘅新衫嚟着，有時仲會攞埋媽咪啲衫，好似時裝表演咁，同學仔好羨慕我㗎。每日放學返到屋企就諗聽日着乜嘢衫好呢？」她最愛的服飾是喇叭褲、短裙仔和恤衫。
努力經營終於得到回報，當年只得12歲的Angelababy已入行拍廣告，她說：「有日返學，有個女人埋嚟畀張卡片我，叫我拍個護膚品廣告，做女主角個女。嗰次係我第一次試妝同掹眉，嘩，真係痛到喊！個廣告拍咗兩日，我仲記得係喺上海新天地拍，得幾千蚊人工咋。」Angelababy現在身價企硬30,000元，身價十級跳。
撞到A貨暗笑
走在街上，放眼都是跟自己打扮相似的老翻，Angelababy說：「其實未必係扮我，只係咁啱大家喜好相同，不過有次撞到個女仔，佢戴嘅帽同孭嘅手袋都同我之前嘅打扮一模一樣，個背影都幾似我，真係忍唔住偷笑！」
場地：Lux
服裝提供：acupuncture
化妝：K.K.Kwong
髮型：CarrChengofPopHairdressing
孖公仔各行各路
近期𡃁模「胸」群而出，有羅凱珊（Kama）、趙碩之、「翻版樂基兒」周秀娜，Angelababy點睇？她說：「我唔係好識佢哋，不過喺雜誌見過佢哋嘅相，個個都幾好，差唔多啦；至於性感，咁佢哋有本錢着嘛，我嘅本錢就梗係留番自己用啦，好似出寫真咁囉。」
「圈子唔同咗」
早前盛傳公司為捧Angelababy做topmodel，嚴禁她與同級女模行騷，她說：「經理人會睇番個job啱唔啱先去做，其實我都鍾意同同級嘅model一齊出嚟，大家年紀差唔多，可以交換扮靚心得，好開心。」
講起同級，不得不提𡃁界女神JaniceMan（文詠珊），兩人初出道時像孖公仔，最近各行各路，更有傳JaniceMan放料激怒Angelababy，她說：「呢排係少咗聯絡，但我哋仍然係好好朋友。我知佢份人係點，我哋成日約埋做spa、食飯傾吓八卦嘢。至於話我同佢個look似，都係因為我哋成日一齊行街睇衫。不過𠵱家佢忙拍戲，我就做model，圈子唔同咗，taste都會慢慢唔同。」
考考你
𡃁模真名大配對
現在幾乎每隔一個月就彈出一位𡃁模，多到令人難以分辨，而且個個只知其英文名，你可分到邊個打邊個？（答案刊於本版）
