我一直都強調，賭波係唔可以牽涉私人感情在內，否則貼士就會唔夠客觀同埋中肯，影響判斷；不過，當遇上自己嘅推介又係自己嘅愛隊，如果再順利中埋，咁就goodfit喇！今次我就推介喺英冠嘅愛隊雷丁，迎戰外號「金絲雀」嘅諾域治可以順利開「大」同埋開[-1]「主勝」。
「金絲雀」聽畀雷丁玩謝
雷丁今屆喺主場米底捷斯基球場表現特別神勇，合計所有比賽，喺主場取得10勝1和1負，仲入咗成34球。佢哋一對前鋒奇雲杜里同埋路爾亨特勇銳唔在講，今場仲有後衞安達比基停賽期滿，可以候命，周六幾近「夫添」對住作客特差嘅諾域治，呢份「治」點會食唔落呀？一於直取雷丁[-1]嘅2.1倍「主勝」，再要埋佢哋贏3:1同埋「主其他」。唔好話我迷信，雷丁嘅吉祥物係獅子京士利，而諾域治就外號「金絲雀」，係人都知貓科動物幾咁鍾意玩謝啲雀仔，今役雷丁仲唔玩謝諾域治咩？
另外，由於雷丁呢場有正選門將夏尼曼因傷缺陣，要由副手費達歷斯把關，失球嘅機會大咗好多，加上諾域治中場李爾哥夫最近又腳風幾順，所以呢場波好有可能開「大」，有1.68倍，捧得過。
博阿仙奴開「客其他」
至於同日另一場心水推介，更加係推介我愛隊中之愛隊嘅阿仙奴，可以喺周六英超早場作客米杜士堡順利勝出。阿仙奴喺周中嘅歐聯雖然作客輸咗畀波圖，但嗰場波個陣弱到拍得住踢聯賽盃，喺呢場英超相信「兵工廠」會露真身，多名主力如前鋒艾廸巴約等會復出，加上米杜士堡又鬧後衞荒，後衞韋達停賽之餘，拉葛特及賀夫等都未「弗」，阿仙奴單W有1.68倍，筍！
合心水嘅話，不妨博大霧要阿仙奴贏「客其他」呢個波膽，因為米杜士堡今屆喺主場河畔球場冇威力可言，曾經喺主場以0:5不敵另一Big4球隊車路士，所以阿仙奴有權大勝。
近5場往績：LLWLL
蘋果波神
水準有目共睹，長跟必有着數。